Çarşenbe künü 31 mayısta, ‘İşğalden azat etilgen territoriyalarda jurnalistika’ mevzusında tögerek masa teşkil etildi. Tedbir Vladimir Dal adında Şarqukrain milliy universiteti, Ukraina milliy havfsızlıq ve mudafaa Keñeşi sahte informatsıyağa qarşılıq Merkezi, Qırımtatar Resurs Merkezi teşkilãtı, ‘Studentlik jurnalistika Platforması’ ve jurnalistik etika Komissiyası tarafından azırlanıldı.
Tedbirde jurnalistler, oca, alim, huquqoruyıcılar, devlet hadimleri, cemaat erbapları ve digerleri iştirak ettiler.
Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev öz çıqışında tögerek masa mezkür sualler Ukraina jurnalistleri arasında ne derecede meraq doğurğanını köstere, dep izaatladı.
‘Tögerek masada iştirak etkmek ve çıqışta bulunmaq istegen mutehassıslarnıñ sayısı çoq olğanı bizim içün emiyetlidir. Biz vaqtınca işğal etilgen territoriyalarnı işğalden azat etüv, reintegratsıya haqqında laf yürsetemiz, aynı zamanda da işğalden qurtulğan territoriyalarda olacaq informatsıon siyaset haqqında da bahs etmelimiz. Şimdiden başlap, jurnalistlerniñ siyasetini şekillendirmelimiz. ‘Qırım istiqbali’ forumında biz bu işni tek başlağan edik’,- qayd etti o.
QRM kommunikatsıya meneceri Tatyana Podvornãk tögerek masada ekspert olaraq iştirak etip, işğalden qurtulacaq Qırımda etnik Kütleviy Haber Vastalarnıñ yañıdan tiklenilmesi ne qadar emiyetli olğanını qayd etti.
‘Tamır halqlarnıñ jurnalistikası olmasa, reintegratsıya esnası tamamına irişecegi şübelidir. Şu sebepten de Ukraina devleti işğalden evel Qırımda çalışqan etnik KHV tez vaqıtta yañıdan tiklenilmesi ve yañılarnıñ meydanğa ketirilmesine yardım köstermeli’,- qayd etti o.
Tatyana şunı da bildirdi ki, bu yönelişte ilk adımlar endi yapıldı, çünki Ukraina ‘Media haqqında’, ‘Devlet tarafından media destegi, jurnalist professional faaliyetiniñ içtimaiy qoruv kefilleri haqqında’, ‘Ukrain tili devlet tili olaraq amelde işletilmesiniñ temin etüvi haqqında’ kibi qanunlarğa deñişmeler kirsetildi. Mezkür deñişmelerge binaen Ukraina tamır halqlarnıñ tillerinde çalışqan medialar devlet ve tamır halqlarnıñ tillerinden afta boyunca efirniñ 75 faizini toldurmalılar. Şundan da ğayrı, qanun cehetinden Ukraina tamır halqlarnıñ tillerinde çalışqan medialarğa devlet tarafından yardım imkãnı bar.
Faqat añılğan deñişmelerni amelge keçirmek içün usullarnı tapmaq meselesi açıq turmaqta ve QRM bu mesele üzerinde çalışmaqta’,- qoştı ekspert.
Kommunkatsıya meneceri bir sıra tekliflerde bulundı:
- Birinciden, şimdiden başlap kütleviy haber vastalarına destek kösterilmesiniñ tertibini işlep çıqarmalı. O KHV-daki tamır halqlarnıñ temsilcileri sermiya ya da ses haqqınıñ 51 faizine sahip olmalı.
- Ekinciden, şimdiden başlap, Ukraina tamır halqlarınıñ haq ve menfaatına dair devlet ve regional programmanı meydanğa ketirmeli.
- Üçünciden, bugünden başlap proffesional kadrlarnıñ azırlanmasını tüşünmeli. Şunıñ içün de universitetlerde mahsus şübeler açmaq kerek.
‘Şundan da ğayrı, etnik KHV- tamır halq tilleri ve menligini saqlamaq içün mahsuldar bir vastadır. Böyle etip, misal olaraq qırımtatar KHV faal şekilde inkişaf etmege başlasa, gençlerniñ de, yahşı bir iş tapmaq içün, qırımtatar tilini ögrenmege ihtiyacı peyda olacaq’, – qoştı ekspert.