Qırımtatar Maaliy Merkezi

Mültimedia

‘Qırımda koronovirus meselesi pek aktual’-Bariyev

19.01.2022

Qırımtatar resurs merkeziniñ reisi, qırımtatar Meclisi çetel işler ve huquq meseleleri boyunca idaresiniñ başı Eskender Bariyev  ‘Qırım.Aqiqat’ portalına intervyu bergende işğal etilgen Qırımda koronavirus pandemiyasınen bağlı sıñırlamalarnı izaat etti.

Bundan evel işğal etilgen Qırımnıñ ‘başı’ Sergey Aksönov yanvarniñ 20-sine qadar yarımadada toplu cemaat yerlerde aşılama haqqında QR kodlarnı köstermek mecburiyetini lãğu etti. Yani yılbaş bayramları yarımadada hiç bir sıñırlama yoq edi. Neticede, QR kodlarnı evelden ilãn etilgeninden daha da erte, yani 17-sinde qaytarmağa kerek oldı.

‘Aksönovnıñ QR kodlar qaytarılması haqqında qararı Qırımda hastalıq artqanı ve bu mesele aktual olğanını tasdıqlay. Yazıq ki, biz vatandaşlarımıznıñ ölümi haqqında sıq-sıq eşitemiz. Bütün dünyada ‘omikron’ virusı darqalğanı ve Qırımğa da toqunacağını köremiz’,- dedi Bariyev.

Ekspert 2021 senesi dakabr ayında sıñırlamalar yengilleştirilgenini  ve QR kodlar lãğu etilgenini mantıqlı saymay.

‘Hastalıq artmasına yollar açıldı. Ne içün? Tamam bayram künleri, adamlar bir yerde toplaşqanda, tedbirler keçirmege mümkün olğanında ciddiy bir problem körem. Madem sıñırlamalar kirsetildi, olarğa tam manada riayet etmeli edi’,- qoştı o.