Logistika qıyınlaşqanı ve vaqtınca işğal etilgen Qırım yarımadasına ketirilüv içün telükeler arttıruvı sebebinden işğal akimiyeti Qırımğa yaqıt taşımağa azır olğan aydayıcılarnıñ qıtlığınen qarşılaşa.
Olğan malümatqa köre, Keriç köpründen büyük kölemli naqliyat areketiniñ sıñırlanmasından ve deñiz alâqasınen meselelerden soñ Qırımğa yaqıtnıñ esas yolu işğal etilgen Ukrayina cenübiy territoriyasından keçken quru koridor olıp qala. Aynı zamanda bu marşrut işğal ordularınıñ arbiy ve logistik astyaplarına muntazam ücümler sebebinden telükeli sayıla.
Neticede, daa çoq aydayıcı, bayağı arttırılğan ücret tekliflerine baqmadan, Qırımğa yaqıt taşımaq seferlerini yapmaqqından vazgeçeler. Bazı aydayıcılar, ayatları içün telüke olğanını añlatıp, naqliyat vastalarından çıqıp, marşrutnı devam etmege red eteler.
Qayd etmeli ki, yaqıt logistikanı işğal rejiminiñ eñ zayıf teminlev unsurlarından biridir. Yaqarlıq ile teminleviniñ bozuluvı tek rusiye işğal quvetleriniñ arbiy ihtiyaclarına degil de, yarımadanıñ grajdanlıq, naqliyat ve turistik saalarına da tesir ete.
“Yaqıt teminlevinen bağlı meseleler vaqtınca işğal etilgen Qırımnıñ arttıracaq tecritini ve rusiye tarafından yaratılğan logistika marşrutlarınıñ sıñırlı olğanını köstere. Telükeli yönelişlerde çalışmağa azır olğan aydayıcılarnıñ qıtlığı, yarımadada işğalci astyapı temin etilmesini qıyınlaştırğan qoşma bir faktor ola”,– Qırımtatar Resurs Merkezi qayd etti.
Fotoresim: İnternetniñ açıq menbalarından