Ernes Ametovğa çıqarılğan hüküm munasebetinen QRM-niñ beyanatı

December 30, 2022

2022 senesi 29 dekabr künü Rostov-na Donu Cenübiy mahkemesi nevbetteki qanunsız hükümni çıqardı: 2020 senesi sentãbr ayında aynı şu mahkeme tarafından aynı şu qabaatlavlardan aqlanğan jurnalist Ernes Ametovnı 11 yılğa azatlıqtan mahrum qaldırmaq. O vaqıtta rusiyede adaletli mahkemeniñ bir zerresi olsa da qalğanına ümüt doğğan edi. Amma rusiye ceza sisteması  2022 senesi Ukrainağa qarşı cenk başlatqan soñ bütün bu ümütlerni yoq etip, Ukraina vatandaşı Ersnes Ametovnı  tekrar ‘terrorizm’ ve ‘hakimiyetni zorbalıqnen zapt etüv’de qabaatladı.

Birinci kere Ernes Ametovnı 2017 senesi işğal etilgen Qırımda tutuqlap, qanunsız şekilde 2020 senesine qadar hapishanede tuttılar. Ekinci sefer ise Ernesni Qırımda 2022 senesi baharde tutuqladılar. Şu vaqıttan berli o, azatlıqtan mahrum qaldırıldı.

Her vaqıt olğanı kibi, qabaatlav tintüv ketişatında silãhlı küçler tarafından gizliden qaldırılğan ‘deliller’, ‘gizli şaatlar’nıñ  aytqanları, ‘ekspertler’niñ hülãsaları esasında çıqarıldı. Eñ mühimi şu ki, ‘dava’nıñ özü – halqara huquqnıñ qaba bozuluvıdır, çünki işğal etilgen territoriyalarda işğalcılarnıñ qanunları çalışmaz.

QRM beyan ete ki, mezkür qarar qanunsızdır, siyasiy sebepli ve cinaiydir. Rf siyaseti işğalni tanımağan Ukraina vatandaşlarını qorquzmaq, uzaqlaştırmaq maqsadını taşıy.

QRM israrlı qarşılıq köstere ve cinaiy hükümniñ lãğu etilmesni, siyasiy mahbüslerniñ azat etilmesini talap ete.