Ukrayina Yuqarı Şurası “Memleket içinde köçip kelgen şahıslarnıñ aqları ve serbestligini temin etüv aqqında” №12301 qanun leyhasını ekinci oquvda qabul etti. Vesiqa memleket içinde köçip kelgen şahıslarnıñ aqları ve serbestliginiñ teminlevi meselelerini idare etecek esas qanun leyhası olacaqtır, “Memleket içinde köçip kelgen şahıslarnıñ aqları ve serbestligini temin etüv aqqında” Ukrayina maqbul qanunı ise lâğu etildi.
Yañı qanun, rusiyeniñ Ukrayinağa qarşı silâlı tecavuzı sebebinden peyda olğan zemaneviy çağıruvlarnı köz ögüne ala ve memleket içinde köçken şahıslarğa qol tutuv devlet mehanizmlerini aktual ihtiyaclarğa uyğun şekilde yañarta.
Hususan, vesiqa, köçip kelgenlerniñ uyğunlaşuv ve integratsiyasından başlap, işğalden soñ evlerine qaytıp, reintegratsiyağa qadar bütün basamaqlarında devletniñ destek kefaletlerini pekitmege teklif ete.
Esas yañılıqlardan biri – memleket içinde köçip kelgen şahıslarnıñ umumiy sebepler esasında pensiyağa aqqınıñ kefil etilmesidir. Qanunğa binaen, VPO içün emeklilik maaşlarınıñ tayin etilmesi, tölenmesi ya da ğayrıdan esaplanmasınen bağlı qoşma ya da umumiy tertipten farqlı talaplar qoyulmay.
Qanunğa binaen, memleket içinde köçken şahısnıñ elektron kabinetiniñ teşkil etilmesi de közde tutula. O, VPO-larnıñ ihtiyaclarını, olarnıñ cemiyetlerge qoşulğanını qıymet kesmege ve kerekli devlet destegini daa semereli bermege imkân berecek.
Ayrı bir maddeler blokı mesken meselesine ait. Qanun memleket içinde köçip kelgen şahıslarnıñ meskennen teminlenmesi içün devlet destek mehanizmlerini kenişlete, em de vaqtınca yaşağan yerlerniñ, şu cümleden modul qasabalarınıñ, yataqhanelerniñ, musafirhanelerniñ ve diger yaşamaq içün uyğun olğan binalarnıñ uquqiy statusını belgiley. Bazı VPO kategoriyaları içün böyle meskenlerde bedava yaşav cenk ya da fevqulâde vaziyet vaqtında ve onıñ bitkeninden soñ daa altı ay devamında sıñırlanmaycaq.
Bundan da ğayrı, qanun, memleket içinde köçip kelgen şahıslarnıñ aqları ve serbestligini temin etüv saasında devlet siyasetini şekillendirecek ve amelge keçirecek merkeziy icra akimiyet organınıñ esas vekâletlerini belgiley. Bu, ükümette kadrlar ya da qurulış deñişmelerine baqmadan, devletniñ VPO-larğa qoltutuv siyaseti devamlılığını temin etmek kerek.
“Memleket içinde köçip kelgen şahıslarnıñ aqları ve serbestliginiñ teminlevi aqqında” yañı Ukrayina qanunı resmiy olaraq derc etilgeninden üç ay soñra işke tüşürilecek.
Yañı qanunnıñ qabul etilmesi memleket içinde köçip kelgen şahıslarnıñ, hususan rusiye tecavuzı sebebinden evlerini terk etmege mecbur olğan vaqtınca işğal etilgen Qırım ve Ukrayinanıñ diger işğal etilgen topraqlarınıñ sakinleriniñ aqlarını qoruv sistemasını eyileştirmek içün müim adımdır, Qırımtatar Resurs Merkezi qayd ete.