Cenk esirlerine munasebet meseleleri boyunca Koordinatsion ştabınıñ vekili Petro Yatsenko ilk yaz ayıniñ 30-nda Ukraiyn buhran media merkezinde “İşğal şaraitinde Qırım qadınları: basqılar ve küreş” matbuat konferentsiyasınıñ spikerlerinden biri oldı. Çıqışta o, devletniñ qanunsız tutulğan Ukraiynlerni, hususan qadınlarnı azat etüv boyunca işi, em de rusiye esirliginde tutulğan grajdanlar aqqında malümatnı vesiqalandırma mehanizmleri aqqında ikâye etti.
Yatsenkonıñ aytqanına köre, qadınlarnıñ azat etilmesi Ukraiyna devletiniñ prioritetlerinden biri olıp qala.
“Ukraiyn devleti qadınlarnıñ azat etilüvine emiyet bere. Qadınlar ağır yaralanğan ve ağır hastalarnen beraber birinci sınıf insanlardır. Şimdi deñişim ve qaytaruv esnasınıñ quvetleşkenini köremiz”, – dep qayd etti Petro Yatsenko.
Onıñ qayd etkenine köre, grajdan ve cenk esirleriniñ qaytarıluvı farqlı mehanizmler esasında yapıla, çünki halqara gumanitar uquq normalarına köre, grajdanlarnı arbiy hızmetçilerge deñişip olamaylar. Aynı zamanda, qanunsız tutulğan grajdanlarnıñ qaytarıluvı muzakere ve siyasiy seviyede devam ete.
Koordinatsion ştabınıñ vekili, qanunsız apis cezasınıñ er bir adisesi qayd etilmesiniñ müimligini qayd etti. Onıñ aytqanına köre, bunıñ içün mahsus bir malümat sisteması yaratıldı, bu ise online ğayıp olğan şahıs aqqında malümat bermek imkânını bere. Bundan ğayrı, Koordinatsion ştab Milliy Haber Bürosı, Ukraiyna Milliy Politsiyası, Ukraiyna Telükesizlik Hızmeti ve diger devlet organlarınen işbirlikte işley.
Biz içün esirlikte olğan er kesni ve hususan tutuluv yerlerini bilmek pek müim. İşten boşatılğan adamlarnen er deñişimden soñ çalışamız. Bizim gruppalarımız azatlıqtan marum etüv yerlerinde körgenleri aqqında malümat toplamaq, esirlikte bulunğanlarını tasdıqlamaq ve qanunsız tutulğan diger Ukraiynlerniñ bulunğan yerini belgilemege yardım etmek içün reabilitatsiya merkezlerini ziyaret eteler”, – Petro Yatsenko dep qayd etti.
Onıñ qayd etkenine köre, malümatnıñ sistematik toplanması ve devlet organlarınıñ işbirligi, qanunsız tutulğan Ukraiyna grajdanlarınıñ qaytarıluvına doğrultılğan işniñ esas unsurlarından biri ola.