Kıyivge yapılğan kütleviy rusiye ücümi neticesinde Ukrayina musulmanları diniy idaresiniñ “Umma” baş camisi ve “Bizim kelecegimiz” gimnaziyası ekinci kere zarar kördi. Bu aqqında Ukrayina musulmanları diniy idaresiniñ müftisi “Umma” Murat Suleymanov bildirdi.
Müftiyat tarafından derc etilgen foto ve videolarda caminiñ binası viranelerden zarar körgenini köstere. Caminiñ yanında büyük bir furtuna peyda oldı. İslâm medeniy merkeziniñ territoriyasında yerleşken “Bizim kelecegimiz” gimnaziyası ve Ukrayina musulmanları kongressi ofisiniñ binaları da bayağı viran etildi.
Hatırlatamız: bu endi ekinci kere rusiye ücümi neticesinde kompleks zarar kördi. Keçken sene bir rusiye “İskander” raketi camiden tahminen 50 metr uzaqlıqta tüşti, patlav dalğası ve viraneler binanı yaraladı ve pencerelerni qırdı.
Şimdiki vaqıtta paytahtqa yapılğan rusiye ücüminde 21 insan elâk oldı. Kıyivde oraq ayınıñ 3-üncisi şeerge eñ büyük rusiye ücümlerinden biriniñ fedaları içün matem künü olaraq ilân etildi.
Qırımtatar Resurs Merkezi elâk olğanlarnıñ qorantaları ve yaqınlarına samimiy taziye bildire, zarar körgenlerniñ tezce yahşı olmasını istey ve rusiye federatsiyasınıñ Ukrayina sakinlerine qarşı yapqan cinayetlerini takbih ete. rusiyeniñ grajdan infrastrukturalarını, diniy binalarnı ve qabaatsız insanlarnıñ canlarını alğan ücümleri halqara gumanitar uquqnıñ qaba bozuluvıdır ve qabaatlılar mesüliyetke çekilmeli.