ATR qırımtatar telekanalınıñ jurnalisti Gülsum Halilova ilk yaz ayınıñ 30-nda Ukraiyn buhran media merkezinde “İşğal şaraitinde qırımlı qadınlar: basqılar ve küreş” matbuat konferentsiyasınıñ spikerlerinden biri oldı. Çıqışta o, rusiye tarafından zenaat faaliyetleri sebebinden taqip etilgeni ve işğalcilerniñ vaqtınca işğal etilgen Qırım yarımadasından tış bulunğan jurnalist ve qadınlarğa qarşı qullanğan mehanizmleri aqqında tarif etti.
Gülsum Halilovanıñ aytqanına köre, Qırım işğalinden soñ o, ATR qırımtatar telekanalınıñ taqımınen beraber er kün insan aqlarınıñ bozuluvı, qanunsız tintüvler, uydurılğan cinaiy işler ve qırımtatarlarnıñ taqip etilüvini aydınlattı. Ukraiynanıñ qıtaiy qısmına köçken soñ jurnalist işğal akimiyetiniñ cinayetleri aqqında haber etmege devam etti.
“Siz kerçekni aytasıñız, bütün bu basqılar aqqında ikâye etkeniñizde, o bu faktlarnen inkâr etip olamay, çünki olar yoq. O, çeşit mehanizmlernen qorqutmağa başlay”, – dep qayd etti Halilova.
Jurnalistniñ aytqanına köre, onıñ zenaat faaliyeti sebebinden rusiye tarafından taqip etile. O, Qırımnıñ grajdan qamaçavını aydınlatqan soñ, işğalciler oña qarşı cinaiy davanı açtılar, onı temelsiz Noman Çelebicihan batalyonınıñ davasınıñ mabüsine çevirdiler.
“Bir yıl devamında anda çalıştım, Qırımnıñ grajdanlıq qamaçavını aydınlattım, ve rusiye meni er kün ATR telekanalında ve diger Ukraiyn telekanallarında kördi, ve Noman Çelebicihan batalyonında iştirak etkenim içün maña qarşı cinaiy davanı açtı. Tehnikiy ceetten onen iç bir alâqam yoq edi, men sadece öz işimni ete edim”, – Halilova dep qayd etti.
Basqı mehanizmlerinden biri işğal etilgen Qırımda alâ daa yaşağan qorantasınıñ taqip etilüvi oldı, o da ayttı.
“Bir yıldan evel rusiye Qırımdaki evinde tintüv keçirildi. O yerde ailem yaşay – anam, babam, ve rusiye babamnı insultqa oğrattı. Er yıl, yılda bir-eki kere, qorantalarımnıñ evine kelip, qayda olğanımnı soraylar. Ana-babam deyler: “Onı efirde köresiñiz, o Kıyivde. Onı qıdırsañız, Kıyivge barıñız. Amma böyle etip meni soy-soplarım içün qorqutmağa tırıştılar”, – jurnalist dep tarif etti.
rusiye Ukraiyna grajdanlarını tek vaqtınca işğal etilgen topraqta degil de, onıñ tışında da taqip ete, çıqışınıñ soñunda Gülsum Halilova qayd etti. Onıñ aytqanına köre, o, Türkiye ava limanında tutulğanda taqipke oğradı. Jurnalistniñ qayd etkenine köre, bunıñ kibi vaqialar diger Qırım qadın sakinlerinen de ola, şunıñ içün vaqtınca işğal etilgen Qırımdan kelgen qadınlar devlet sıñırlarını keçkende diqqatlı olmaq kerekler.