Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev, halq deputatları Ğeorğiy Mazuraşa ve Mıkola Tişçenko tarafından imzalanğan ukrayinlerge Ukrayinanıñ tamır halqı statusınıñ berilmesine dair №15103 qanun leyhasını izaatladı. Onıñ aytqanına köre, böyle teşebbüs Ukrayina Anayasası ve halqara uquq ceetinden ciddiy suallerni doğura.
Bariyev hatırlattı: Ukrayina Anayasası daa 1996 senesi Ukrayina halqınıñ terkibini belgiledi.
“Ukrayina halqı ukrayin milleti, tamır halqlar ve milliy azlıqlardan ibarettir. Bu sebepten Esas Qanun tamır halqlarnıñ ve milliy azlıqlarnıñ uquqlarını ayrı qanunlarnen belgilemek kerekligini belgiledi”.
Onıñ qayd etkenine köre, ukrayin milleti – mustaqil devletniñ meydanğa ketirilmesi neticesinde öz taqdirini belgilev aqqını yerine ketirgen devlet yaratuv milletidir.
“Bu sebepten ukrayinler halqara uquqta belgilengen ve Birleşken Milletler Teşkilâtınıñ vesiqalarında qullanılğan manada tamır halqı añlamına kirmeyler”.
Bariyevniñ aytqanına köre, tamır halq statusı, yaşağan devletiniñ tışında öz devletçiligi olmağan halqlarnı qorçalamağa çağırıla, Ukrayina qanunı ise “Ukrayina tamır halqları aqqında” Ukrayina tamır halqlarınıñ, ilk evelâ qırımtatar halqınıñ, öz aqlarını tanımaq içün çoq yıllıq küreşiniñ neticesi oldı.
“Bugün, Ukrayina dünyağa halqara uquqqa ve insan aqlarını qorçalavğa sadıq olğanını köstergende, uquqiy añlamlarnı siyasiy şiarlarnen deñiştirmemek pek müimdir”, – dep qayd etti.
Ukrayin milletine devlet yaratıcı millet olaraq sayğı ve Ukrayinanıñ tamır halqlarınıñ aqlarına sayğı bir-birine zıt kelmey, olar küçlü, demokratik ve uquqiy devletniñ temelidir, Eskender Bariyev qayd etti.
Men semetdeşim, Ukrayina Silâlı Quvetleriniñ arbiy hızmetçisi, uquqçı ve advokat Vlad Lâşenko fikirine bütünley qol tutam. “Ukrayinler “tamır halqı” olmasın, çünki bu, ukrayinler öz milliy devletini ğayıp etkenler dep manağa kele!
Qırım ve Donbas – Kıyiv ve Zakarpattâ kibi Ukrayinadır!” – QRM-niñ İdare Reisi dep qayd etti.