İşğal etilgen Qırımnı qıtaiy Ukrayinanen bağlağan köpürlerge yapılğan muvafaqiyetli ücümlerden soñ işğal akimiyeti Qırım SİZO-sından mabüslerniñ ketirilmesini vaqtınca toqtattı, Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev bildirdi. Onıñ aytqanına köre, bu teneffüs qısqa oldı – yaqıt qıtlığı peyda olğan soñ, işğalciler yarımadadan siyasiy mabüslerni çıqarmağa başladı.
“Tam insaniyetsiz şaraitte, adamlarnı yarımadadan Krasnodar ve Rostovğa alıp çıqtılar. Aşıqıp çıqarğanlar arasında Ukrayina grajdanları bar edi: Batenko Roman Valeriyovıç (md. 275 rf CK), Zaporijjâ vilâyetiniñ Berdiansk şeerinde doğdı; Şıkolenko Andriy Oleksiyovıç (md. 276 rf CK), Kursk vilâyetiniñ Kursk şeerinde doğdı; Yevsmanskıy Viktor Vasilövıç (cт. 276 rf CK), Zaporijjâ vilâyetiniñ Poloğovskıy rayonınıñ Poloğı şeerinde doğdı.
Üçü işğal etilgen Qırımğa Zaporijjâ vilâyet makemesiniñ oturışuvına ketirildi, oturışuv baş makemeci N.S.Yurtovnıñ erkânında, devlet qabaatlayıcısı – Qırım Cumhuriyeti prokuraturası idaresiniñ bölük prokurorı Y.A.Sklârovnıñ ve makemeci yardımcısı D.A.Senişnanıñ iştiraginen keçirildi. 2026 senesi ilk küz ayınıñ 26-na qadar apiste tutuv müddeti uzatılğan soñ, olarnı da Mariupolniñ 2-nci SİZO-na alıp kettiler”, – uquq qoruyıcı dep qayd etti.
Bariyevniñ aytqanına köre, siyasiy mabüs Roman Râbçık (md. 276, ч. 2 md. 280 rf CK) işğal etilgen Qırımdan Donetskte SİZO-1ge avuştırıldı, İrına Levçenko (md. 276 rf CK) üç yıldan ziyade qanunsız esirlikte tutulğan Melitopol sakini acele sürette Krasnodar SİZO-sına avuştırıldı.
Ruslan Lavrik (md. 275 rf CK), Enerğodardan Zaporijjâ AES müendisidir, ve Arseniy Deçkin (b. 3 p. «в» md. 222.1, md. 275 rf CK) Aqyar sakini qanunsız sürette apis cezasını çekmek içün Tümenege avuştırıldı, daa bildirdi.
“Aynı bu vaqıtta Qırımnıñ işğal “makemeleri” ve rusiye makemeleri Ukrayina grajdanlarını yapmağan cinayetleri içün onlarca yılğa maküm etip, birer-birer qanunsız makeme qararlarını çıqara. Böyleliknen, ilk yaz ayınıñ 17-nde makemeci Natalâ Kulinska, 2025 senesi arman ayınıñ 5-nde Aqmescitniñ Soçi ava limanında tutulğan İbraim İbraimovnı, 280.000 ruble miqdarında SBU faydasına para yibergeni içün 17 yılğa qadar azatlıqtan marum etüv, azatlıqtan marum etüv müddeti 1 yıl 6 ay ve 200 biñ ruble miqdarında para cezasına maküm etti”, – dep qayd etti QRM-niñ İdare Reisi.
İlk yaz ayınıñ 25-nde Qırım Yuqarı makemesinde makemeci Serğiy Pogrebnâk Oleksandr Osadçıynı 1 yıl ve 10 ayğa sıñırlanıp, 19 yıl apis cezasına maküm etti ve 400 biñ ruble para cezasını berdi. O, casuslıq, devlet satqınlığı ve SBU-nen işbirlik yapqanında qabaatlandı, Bariyev şunı da qayd etti.
İlk yaz ayınıñ 24-nde Cenübiy okrugınıñ arbiy makemesiniñ arbiy makemecisi Arslan Jağinov işğal etilgen Aluştanıñ sakini, Kirovoğrad vilâyetiniñ Dolınivka şeerinde doğğan, 60 yaşındaki Alla Batsürni (23.09.1965), Qırım köprüni yoq etmege çağırğanları içün 5,5 yıl apis cezasına maküm etildi.
İşğalci sistema soñki resurslarını qorqu logistikasına masraf ete bile, amma cinayetleriniñ miqyasını gizlep olmay, uquq qorçalayıcı qayd etti.
“Bu cedveldeki er bir soyad – statistika degil, rusiye terrorınıñ canlı şaatıdır.
Ukrayinlerni evlerinden ne qadar kilometr ayırsa da, rusiye er bir etaplı ve qanunsız maküm etilgen grajdan içün mesülietli olacaq. Ve cinayet qararlarını çıqarğan makemeciler, Gaagadaki Halqara cinaiy makemede – diktatorı yanında – qabaatlanğanlarnıñ kürsüsinde bulunacaqlar”, dep qayd etti o.