İlk yaz ayınıñ 26-nda Qırımtatar bayrağı künü munasebetinen Kıyivdeki Ukrayina Tış İşler Nazirliginiñ (TİN) binası yanında qırımtatar halqınıñ milliy bayrağını köterüv tantanalı merasimi olıp keçti.
Tedbirde Ukrayina tış işler naziri Andriy Sıbiğa, Qırımtatar Milliy Meclisiniñ reisi Refat Çubarov, qırımtatar halqınıñ lideri Mustafa Cemilev, Ukrayina Prezidentiniñ Qırım Muhtar Cumhuriyetindeki Daimiy Temsilcisi Olğa Kurışko, em de devlet müessiseleri, diplomatik korpus, içtimaiy teşkilâtları ve matbuat vastalarınıñ vekilleri iştirak etti.
Qırımtatar Resurs Merkeziniñ vekilleri arasında: QMC İdaresiniñ reisi, Qırımtatar Milliy Meclisiniñ azası Eskender Bariyev, uquqçı Lüdmıla Korotkıh, kommunikatsiyalar menecerleri Tetâna Savçuk ve Valentına Manjula bar edi.
Merasimni açıp, Ukrayina tış işler naziri Andriy Sibıga qırımtatar bayrağı Qırımnıñ azatlığı ve işğalden qurtarıluvı oğrunda küreşniñ timsali olğanını qayd etti.
“Qırımtatar bayrağı – qırımtatar halqınıñ hatırası, itibarı ve qaviyligini aks etken bir timsaldir. Amma bugün o, işğalge qarşı küreşniñ, adalet içün küreşniñ ve evge qaytmaq inancınıñ timsali oldı. Bugün qırımtatar halqı işğal akimiyetiniñ repressiv siyasetiniñ esas maqsadlarından biri oldı. Lâkin rusiye “insanlarnıñ iradesini bozmağa” muvafaqiyetli olmadı,” dep qayd etti o.
Qırımtatar bayrağınıñ Ukrayina Tış işler nazirligi yanında köterilüv ananesi 2016 senesinden başlandı, Sıbiğa da qayd etti.
Qırımtatar Milliy Meclisiniñ reisi Refat Çubarov ilk yaz 26 kününiñ qırımtatar halqı içün tarihiy emiyetini hatırlattı ve vaqtınca işğal etilgen Qırım sakinlerine ve ukrayin siyasiy mabüslerine qol tutqanını bildirdi.
!35 yıldan evel Aqmescitte qırımtatar halqınıñ ekinci Qurultayı toplaştı. Onı “yañıdan doğğan ya da yañıdan qurulğan Qurultay” dep adlandıralar, çünki o, 74 yıllıq arağa, sovet akimiyetiniñ kelgenine köre, toplandı. Onıñ qararlarından biri qırımtatar halqınıñ milliy gimni ve milliy bayrağı aqqında qararnı qabul etmek edi. Bu künü bizler halqımızğa, etnik ukrayin qardaşlarımızğa, vaqtınca işğal etilgen Qırımda yaşağan ve Ukrayina devletine sadıq qalğan Ukrayina grajdanlarına qol tutuv sözlerinen muracaat etemiz. rusiye apishaneleriniñ inanılmaz derecede ağır ve insaniyetsiz şaraitinde qabaatsız qalğan qırımlı siyasiy mabüslerniñ fedakârlığına minnetdarmız”, – Refat Çubarov dep qayd etti.
Qırımtatar bayrağı ukrayinler ve qırımtatarlarnıñ Qırımnı azat etüv küreşiniñ timsalidir, Ukrayina Prezidentiniñ Qırım Muhtar Cumhuriyetindeki Daimiy Temsilcisi Olğa Kurışko qayd etti.
rusiye federatsiyası qırımtatarlarnıñ ve ukrayin halqınıñ kimligini yoq etmege istey. Amma bu yerde umumiy inancımız aqqında aytmaq müimdir, çünki bugün bu bayraq – Qırım yarımadasınıñ azat etilmesi umumiy mevamımız ve areketlerimizniñ şaatıdır. Qırımnıñ azat etilmesinden soñ bir çoq şeerde qırımtatar bayrağı köterilmek kerek, dep tüşünem. Aynı bugünde-bugün bir çoq devlet müessiselerinde olğanı kibi, mında, Ukrayinanıñ nezareti altında olğan topraqta ve çetelde o endi buluna”, – Kurışko dep qayd etti.
Qırımtatar halqınıñ lideri Mustafa Cemilev çıqışta bulunıp, ukrayin qoruyıcılarınıñ Qırımnı işğalden qurtaruv küreşine qoşqan issesini qayd etti ve yarımadanıñ Ukrayina nezareti altına qaytarılacağına işanç bildirdi.
Soñki yıllar bu bayraq işğal etilgen ukrayin topraqlarını azat etmek içün küreşken Ukrayina Silâlı Quvetleriniñ bir çoq batalyonınıñ ştablarında körüne. O, AQŞ içün para cıyğan bir çoq hayriye aktsiyalarınıñ bir parçası oldı. Qırımnıñ arbiy obyektleri ve territoriyasına yapılğan muvafaqiyetli darbeler, logistika yollarınıñ çoqusınıñ yoq etilmesi, bunıñnen beraber, Qırım territoriyasına rusiye tarafından er angi teslimatnıñ imkânsızlığı, Qırımnıñ işğalcilerden bütünley azat etilmesi kününi, şübesiz, bayağı yaqınlaştıra, Cemilev dep qayd etti.
Qırımtatar halqınıñ lideri çıqışta bulunıp, Qırımnıñ işğalden qurtarıluvı qaçınılmaz, rusiye ise vaqtınca işğal etilgen yarımadanı tutıp olamaz, dep qayd etti.
Bayramnıñ eñ genç ve eñ meraqlı iştirakçileri “Birlik mektebi” litseyiniñ talebeleri oldı. Balalar ukrayin ve qırımtatar tillerinde şiirler icra ettiler, em de qırımtatar halqınıñ zengin medeniyeti, tarihı ve ananelerini aks etken öz bediiy eserlerini taqdim ettiler.
