Qırımtatar Resurs Merkeziniñ meneceri Zarema Bariyeva Ukrayinada “BMT-Qadınlar” bölügi tarafından teşkil etilgen qadın siyasiy liderliginiñ inkişafı treningde iştirak etti.
Bariyevanıñ aytqanına köre, Ukrayinada Avropa integratsiyası esnaslarını köz ögüne alıp, qadınlarniñ siyasette rolüni quvetleştirüv arttıra. Amma bu yolda memleket alâ daa bir sıra qıyınlıqlar, sıñırlar ve stereotiplernen qarşılaşa.
“Avropa birligi yüksek standartlarnı belgiley, amma kerçek deñişmeler vaqıt ve sistematik ğayret talap ete. Şuniñ içün “BMT-Qadınlar” strukturaları sayesinde Ukrayinada yüzlernen qadın liderler areketsiz degil de, añlayışlı ve sistemli şekilde areket etmek, öz potentsialını Avropa mimarlığı çerçivesinde kerçek siyasiy deñişmelerge çevirmek, cemiyetimizni Avropa Birliginiñ standartlarına yaqınlaştırmaq içün ögrene”, – dep qayd etti.
QRM-niñ meneceri, üç künlik intensiv tedbirde Ukrayina çeşit regionlarından kelgen idareciler ve iştirakçilerniñ ameliy tecribesinen nazariy azırlıq birleştirildi, dep tarif etti.
“Üç kün devam etken intensiv treningler, em trenerlerniñ, em de Ukrayinaniñ çeşit köşelerinden kelgen iştirakçilerniñ ameliy tecribesinen yahşı balanslanğan nazariyege tolusınen battı. Men qadınnıñ qabaatsız bir küç olğanına, başqaları yalıñız boşluq körgen yerde köpür qurıp, qıyın meselelerni güzel muvafaqiyetlerge çevirgenine – kene işandım”, – Bariyeva dep qayd etti.
Onıñ aytqanına köre, talim devamında iştirakçiler liderlik, strategik tüşünce ve zemaneviy çağıruvlar şaraitinde qararlarnı qabul etüv qabiliyetlerini inkişaf ettirgen bir sıra mevzularnı ögrendi.
“Trening devamında programmağa kirsetilgen bir sıra mevzularnı ögrendiler ve şimdiki vaqıtnıñ çağıruvlarına tez cevap bermege, strategik qararlarnı qabul etmege ve Ukrayinaniñ siyasiy manzarası pek qıyın olğanına baqmadan, dayanıqlılıqnı saqlap qalmağa imkân bergen beceriklerini ve liderlik sıfatlarını işlep çıqardılar”, – QRM-niñ meneceri dep qayd etti.
Tedbir, tecribeniñ paylaşılması, yañı ihtisas bağlarınıñ qurulması ve aynı fikirde olğan insanlarnen bağ qurulması içün müim meydançıq oldı – qayd etti.
“Şahsen menim içün, bayağı ameliy becerilerimden ğayrı, bu tedbir tecribemniñ deñişüvi ve fikirdeşlerniñ sinergiyası içün meydan oldı. İlimnen silâlanğan ve yañı cemiyet çağıruvlarına azır olıp,nenri ketemiz!” – Bariyeva dep yekünledi.
