İlk yaz ayınıñ 10-nda rusiyenen idare etken Aqmescitniñ Kıyiv rayon makemesinde “Hizb ut-Tahrir” davasında “Bağçasaray qadın gruppası” oturışuvı olıp keçti. İşğal makemesi Esma Nemetullayeva, Elviza Aliyeva, Nasibe Saidova ve Fevziye Osmanovağa tevqif müddetini 2026 senesi ilk küz ayınıñ 14-ne qadar uzattı. Bunı “Qırım birdemligi” bildire.
Hatırlatamız: işğalciler dört qırımtatar qadınını rusiyede yasaq etilgen “Hizb ut-Tahrir” teşkilâtınıñ faaliyetinde qabaatlaylar. İşğal etilgen Qırımda “Hizb ut-Tahrir” davasınıñ mabüsleri qadınlar olğan ilk vaqiadır.
Esma Nemetullayeva – beş çağına yetmegen qızınıñ anası, Bağçasaray sakini, 2023 senesi apishanege alınğan siyasiy mabüs Remzi Nemetullayevniñ apayı. Elviza Aliyeva – Qırım federal universitetiniñ dörtünci kurs talebesi, Bağçasaray rayonınıñ Dolınne köyüli. Nasıba Saidova – Qırımda belli olğan imamnıñ qızı, Holmovka bala bağçasında pedagogı. Fevziye Osmanova Aqyar rayonınıñ Orlivka köyüli, tükânda satıcı.
Qırımtatar Resurs Merkezi qırımtatar qadınlarınıñ taqip etilmesini takbih ete ve onı vaqtınca işğal etilgen yarımadada qırımtatarlar ve musulmanlarğa qarşı yapılğan qorqutuv ve basqılarnıñ devamı olaraq tanıy.
Bu “dava” aqqında QRM-niñ rilsini bu bağlantı üzerinden seyir etmek mümkün: https://www.facebook.com/reel/1090408854164441