Er yıl ilk yaz ayınıñ 26-nda qırımtatarlar Qırımtatar bayrağı kününi qutlaylar. Bayram 2010 senesi Qırımtatar Yaşlar Merkezi ve diger gençlik teşkilâtlarınıñ teşebbüsi ile başlandı ve qırımtatar halqınıñ tarihı, medeniyeti ve milliy timsallerine diqqat celp etmek içün teşkil etildi.
Bu künniñ arfesinde Qırımda “Er bir evde bayraq” yañı cemaat teşebbüsi başlandı, maqsadı – qırımtatar milliy bayrağınıñ Ukrayina tamır halqınıñ esas timsallerinden biri olaraq qullanılmasını desteklemek ve populârlaştırmaq.
Crimeaflag taqımı leyhanıñ başlanuvı aqqında haber etti. Olarnıñ aytqanına köre, teşebbüsniñ meydanğa ketirilmesine imayecilerniñ muracaatları ve ricaları sebep oldı. Leyha çerçivesinde taqım Levadka köyünde 12 metrlik bayraqtaşnı qurdı ve mahsus donatmalarda yañı qırımtatar bayrağını yaptı.
Teşebbüsçiler qırımtatar bayrağını er bir qırımtatar qorantasınıñ ayatınıñ ayırılmaz bir parçası yapmağa ve evlerde onıñ barlığını milliy ananege çevirmege istegenlerini qayd eteler. Bu maqsatnen olar “Er bir evde bayraq” leyhasınıñ başlanuvını ilân ettiler ve er istegen insannı bu teşebbüske qoşulmağa çağırdılar.
Qırımtatar halqı içün bayraq tek milliy timsal degil de, tarihiy hatıra, medeniyet ve öz-özüni tanıma saqlavnıñ müim elementidir. Bu kibi teşebbüsler, tamır halqnıñ milliy kimligi ve medeniy mirasını saqlav meseleleri pek müim ve aktual olğan vaqıtta, Qırımda hususan şimdi müimdir.
Qırımtatar Resurs Merkezi böyle cemaat teşebbüsleriniñ peyda oluvını alğışlay ve Qırım sakinlerni leyhağa qol tutmağa çağıra. Milliy timsallerniñ saqlanması ve populârlaştırılması qırımtatar halqınıñ birligini pekitüv, qıymetlerini kelecek nesillerge keçirüv ve qırımtatar kimliginiñ tasdıqlanmasında müim bir issedir.
Çünki er bir qırımtatar bayrağı, evniñ üstünde ya da cemaat meydanında köterilgen olsa, öz tarihiniñ hatırası ve qırımtatar halqınıñ kelecegine olğan işançınıñ timsalidir.