Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev “Suspilne” neşirine bergen intervyüsinde işğal etilgen Qırımda ve işğal etilgen Herson vilâyetiniñ bir qısmında aşayt malları, yaqıt ve qurucılıq malzemelerinen bağlı meseleler qayd etilgenini bildirdi. Mağazalarda bazı mallar sıñırlı şekilde berile, benzin stantsiyalarında nevbetler ve benzin qıtlığı saqlanıla.
“Şimdi benzin vagonlarınıñ aydayıcıları işten vazgeçeler, vagonlarnı terk eteler ve işten boşatılmaq içün arizalar yazalar, böyle adise çoq. Onıñ içün saipler Qırımğa yaqıt taşığan adamlarnı tapmaq içün 300 biñ rublelik aylıq teklif eteler”, – Bariyev dep añlata.
Onıñ aytqanına köre, Qırım sakinleri işğal akimiyetiniñ bildirüvlerine pek işanmay ve yaqıt ve aşayt mallarını yedeklemege tırışalar.
“İşğal akimiyeti sakinleştirmege tırışa, Sudaqta, Aqmescitte, Aqyarda yaqıt peyda olğanına dair malümat bere. İnsanlar kelgende, benzin almaq içün vaqıt yoq, ve olar benzinsiz qalalar. İşğalci akimiyet, kerçek olmağanına baqmadan, işğal etilgen Qırımda 1,5 aylıq yanacaq yedekleri bar, dep ayta. Sşlıq, şeker bar ve o da yeter, aytalar. Lâkin insanlar aşsız qalmaqtan qasevetlene. Azıq malları, qurucılıq malzemeleri ve yaqıt meseleleri tek Qırımda degil, Geniçesk rayonında da bar. Yemeklerniñ çoqusı mında Canköyden ketirildi, şu cümleden ekmek de. (…) Bazı mallar bar, amma olarnı 1 ya da 3 kilogrammğa sıñırlaylar. İnsanlar, aş, un, şekerni saqlamağa tırışalar,” – ekspert dey.
Qırımda cemaat naqliyatınıñ meseleleri de arta. Endi şeerlerara demiryol alâqası tek yarıq vaqtında keçirile. rusiye turistlerini Keriçten ve Keriçke trenlerge avtobuslarnen alıp keteler. Şeerlerde ve meskün yerler arasında cemaat naqliyatınıñ sayısı da eksildi.
“Yerli ve şeerlerara naqliyatnıñ sayısı eksildi, işğalciler yaqıtnı iqtisat ete, evden bilet ya da yaqıt satqanlarğa qarşı memuriy ve cinaiy davalar açıla, bu ise Qırımda faal şekilde yüz bere. Ve çoq vaqıt turğan arabalar ceza meydançıqlarına tahliye etile, çünki olar yañlış yerde turalar ve benzin vagonlarınıñ kelmesine keder eteler,” dep añlata o.
Bu Qırımnıñ turistik mevsimine tesir ete.
“Qırımda çoq insan mevsimniñ olacağını qasevet ete. İşğal akimiyeti içün onıñ keçirilmesi müimdir, çünki Qırım iqtisadiyatı yaz mevsimine bağlıdır. Ve vaziyet quvançlı degil. Or boynunda patlav ketirüv esnasını zorlaştıra,” – Barıyev añlattı.