Bugün öz tarihiy Vatanı – Qırımda yaşağan qırımtatarlar öz tilini ve milliy kimligini saqlamaq içün imkânlarnı qıdırmağa devam eteler. Qırımtatar tilinde tasil almaq qıyın olsa da, ana-babalar birleşip, mekteplerde milliy sınıflarnıñ açılmasını talap eteler.
Azat.team taqımı, ana-babalarğa Qırım mekteplerinde qırımtatar sınıflarını açmağa yardım etmek içün sinif.ru leyhasınıñ yañartılğan versiyasını taqdim etti. Eñ müim yañılıq – yarımadanıñ bütün umumtasil mekteplerini köstergen interaktiv harita.
Servisniñ yardımınen ana-babalar kerekli mektepni tapıp, qırımtatar sınıfınıñ açılması içün ariza bere ve istegenler cedveline qoşula bile. Belli bir mektepte yeterli sayıda ariza toplanılğanda, iştirakçilerni nevbetteki areketlerni idare etmek içün birleştirecekler. Yaratuvcılarnıñ malümatına köre, milliy sınıfnıñ açıluvı içün altı bala yeterlidir.
Ana-babalarnıñ çoqusı özlerini balaları qırımtatar tilinde tasil almasını istegen yekâne adam olaraq saya. Yañı interaktiv harita, fikirdeşlerni tapmağa, ğayretlerni birleştirmege ve milliy tasil talaplarını daa çoq körsetmege yardım etecek – leyhanıñ teşebbüsçileri qayd eteler.
Bugün qırımtatar tiliniñ saqlanuvı pek müimdir. UNESCO tarafından telüke astında olğan tiller cedveline kirsetilgen. Tamır qırımtatar halqı içün til tek qonuşuv vastası degil, aynı zamanda tarihiy hatıra, medeniyet, ananeler ve milliy kimlik taşıyıcısıdır.
Bugün qırımtatar tilini ögrenüv imkânları sıñırlı qala. Yazıq ki, qırımtatarlar ana tilini ögrengen sınıflarnıñ açılmasında ve onı qullanmaq içün yerlerniñ qısqartılmasında qıyınlıqlarğa rastkele.
Şunıñ içün sinif.ru kibi teşebbüsler qırımtatar tilini saqlamaq ve kelecek nesillerge ögretmek içün pek müimdir. Çünki tili – milletniñ kodıdır, onıñ saqlanuvı ise – halqnıñ ve onıñ özgünliginiñ saqlanuvı içün esas şartlardan biridir.