Rak hastalığınen uzun küreşten soñ, 70 yaşındaki Canköy sakini Halil Mambetovnıñ apayı Lilâ Mambetova vefat etti. Bu aqqında “Qırım birdemligi” haber ete.
Lilâ Mambetova siyasiy mabüslerniñ ömür arqadaşı edi, olarnıñ omuzlarına rusiye işğal akimiyetii tarafından tuvğanlarınıñ çoq yıllıq taqip etilmesiniñ bütün ağırlıqları tüşti. O, aqayınıñ qanunsız apis etilmesi devamında oña qol tuttı, qorantasını destekledi ve adaletke ve evge qaytmasına ümütini coymadı.
Lilâ Mambetovanıñ ölümi onıñ tuvğanları, yaqınları ve onı samimiy, cesür ve merametli insan olaraq tanığan er kes içün ağır bir ğayıp oldı. Halil Mambetovnıñ apishanede bulunması ve qorantasınen vedalaşmaq ve bu ağır vaqıtta onıñ yanında olmaq imkânından marum qalması pek de kederlidir.
Qırımtatar Resurs Merkezi Halil Mambetov, onıñ tuvğanları ve yaqınlarına ğayıp oluvı sebebinden samimiy taziyelerini bildire. Bu ğayıpnıñ acısını paylaşamız ve qorantalarımıznen beraber keder içinde başımıznı egemiz.
Hatırlatamız: Halil Mambetov 2023 senesi qara qış ayınıñ 24-nde rusiye quvetçileri tarafından vaqtınca işğal etilgen Qırımda qırımtatarlarğa qarşı basqı dalğası vaqtında qanunsız tutuldı. İleri yaşına ve sağlıq meselelerine baqmadan, o apishanede qala. Onıñ davası, rusiye işğal akimiyetii tarafından yarımadada qırımtatarlar ve Ukrayina tarafdarları içün etilgen siyasiy sebeplerden taqip etilüviniñ misallerinden biridir.