Qırımtatar Resurs Merkeziniñ meneceri Zarema Bariyeva işğal etilgen Qırımda rusiye quvetçileri tarafından “devlet satqınlığı”nda qabaatlanğan ve Aqmescitniñ 1-nci SİZOa yerleştirilgen 34 yaşındaki Svitlana Kolomiyets taqip etilgeni aqqında bildirdi.
Uquq qorçalayıcısınıñ sözlerine köre, Svitlana Kolomiyets Aqmescitte doğdı, oquğan soñ Çerniğivge köçip, Ukrayina Devlet sıñır hızmetinde hızmet etti.
“9 yıl devamında Svitlana Kolomiyets Çerniğiv şeerindeki Ukrayina Devlet sıñır hızmetinde hızmet etti. Anda Svitlana evlendi ve eki qız doğurdı. Svitlananıñ sabıq aqayı da sıñırcı edi, amma 2022 senesi Mariupol mudafaasında elâk oldı”, – dep Bariyeva qayd etti. Hızmetini bitirip, qadın Qırımğa qayttı, anda anası ve qızlarınen yaşadı.
«UDSHde hızmetini bitirip, genç qadın qoranta şaraiti sebebinden eki balasınen anasınıñ yanına Qırımğa qaytmağa qarar berdi. Yañı zenaat aldı ve kirpikler ustası olıp çalıştı. Bir qaç yıl evelsi Qırımda Svitlananıñ üçünci qızı doğdı, anası apiske alınğan vaqıt o üç yaşında bile degil edi”, – dep QRM-niñ idarecisi bildirdi.
Bariyeva taqip sebepleri aqqında aytqanda, işğal akimiyetiniñ Ukrayinanen alâqası olğan insanlarğa qarşı repressiya siyasetiniñ quvetleştirilmesini qayd etti.
“Qırımnıñ işğalden azat etilmesini yaqınlaşqanınen, işğal akimiyetindeki telâş artıp tura. Rejim paranoyası sıñırlarını aştı: casuslar, diversiyacılar ve agentler olarğa er yerde rastkele. Eñ büyük telükege evel ukrayin qurulışlarında çalışqan ya da bugün Ukrayinanıñ serbest toprağında tuvğanları ve tanışlarınen qonuşmağa devam etken insanlar oğray”, – dep o qayd etti.
Uquq qorçalayıcısınıñ aytqanına köre, Svitlana Kolomiyets taqip etilmeden evel oña memuriy apis cezası berildi.
“Amma cinaiy apisden evel, 2025 senesi oraq ayınıñ 17-de, rf Memuriy uquq bozuvları qanunnamesiniñ 20.1-nci maddesiniñ 1-inci qısmına binaen oña beş künlik memuriy apis cezası berildi. O vaqıt tutuluvınıñ uydurılğan sebebi, onıñ cemaat ögünde qullanğan edepsiz lafları oldı”, – dep Bariyeva bildirdi.
O şunı da qayd etti ki, 2026 senesi çiçek ayınıñ 23-nde qadınnı işğal quvetçileri tekrar yaqaladılar.
“Soñra belli olğanı kibi, üç çağına yetmegen balanıñ çoq balalı anası rf Ceza qanunnamesiniñ 275-nci maddesine istinaden “devlet hainligi”nde qabaatlandı”, – dep QRM-niñ idarecisi qayd etti.
İşğal etilgen topraqlarda qadınlarnı “devlet hainligi”nde qabaatlap, taqip etüv adiseleri sıq-sıq ola – Bariyeva añlattı.
“Ukrayinanıñ bütün işğal etilgen topraqlarında, şu cümleden Qırımda, devlet hainligi maddesine istinaden qadınlarnıñ qanunsız apiske alınması adiseleri er kün arta”, – dep o qayd etti.
Uquq qorçalayıcısı, öyle taqiplerniñ fedası olğan diger Qırım qadınlarınıñ misallerini ketirdi, olarnıñ arasında Saha Manğubi (eki çağına yetmegen balanıñ anası), Diana Abduraşıtova (üç çağına yetmegen balanıñ anası) ve Oleksandra Strilets (eki çağına yetmegen balanıñ anası).
“Bu taqipler tek analarnıñ taqdirini degil de, olardan ayırılğan balalarnıñ taqdirini de bozdı”, – dep Bariyeva yekünledi.