Qırımtatar Resurs Merkezi işğal etilgen Qırımda qanunsız sürette tutulğan siyasiy mabüs Anatoliy Kobzarnıñ sağlıq vaziyeti fenalaşqanı aqqında haber aldı. Bundan da ğayrı, eliniñ qırılması, yürek meseleleri ve ayaqları ağır olğanından ğayrı, timsaqlar bozulğanı ve büyük tiş meseleleri qayd etilgen.
Ne yazıq ki, Anatoliy Kobzarnıñ kritik alına baqmadan, kerekli tibbiy yardımnı oña alâ daa bermeyler. Qara qış ayınıñ 8-nde elini qırdı, amma gipsini saban ayınıñ 10-nda çıqarıp oldılar. Vaqıtında ve doğru tedaviylev olmağanından sebep kemik doğru degil şekilde bitişti, ve qol, kerçekten de, tam işlevini ğayıp etti.
Bundan da ğayrı, 2026 senesi kiçik ayınıñ 29-nda siyasiy mabüsniñ qulaq zarı yırtıldı. Berilgen malümatqa köre, apishanede tutulğanda, oña yapılğan beden zulumı neticesinde o yaralana bile edi.
Bundan da ğayrı, siyasiy mabüsniñ tizleri pek ağıralar. QRM-niñ malümatına köre, şimdi o, mustaqil tarzda areket etmege ve merdivendenköterilmege qıyın, tek yardım ile yürip ola.
Bundan ğayrı, tişlernen ciddiy meseleler aqqında da haberler bar. Bir qaç tişi sorğu vaqtında qırıldı ve tutuluvdan soñ zorbalıq qullanıldı. Başqaları ise kerekli tedaviylev olmağanı içün acele tibbiy yardımğa muhtac.
Qanunsız tutulğanına qadar Anatoliy Kobzarnıñ hronik hastalığı ve ciddiy sağlıq meseleleri yoq edi. O, 193 santimetrge qadar öskeninen 40 kilogrammğa azlaştı. Onıñ bulunğan yeri belli olğanından ve yollamalar berilgeninden soñ, o, bir qaç kilogram aldı, amma sağlığı kritik alda qala– qayd etmek kerek.
Bundan da ğayrı, yedi aydan berli SİZO memuriyeti Anatoliy Kobzarğa tuvğanlarınen körüşmege ruhset bermey, onıñ qorantası siyasiy mabüsni çoq vaqıt körmey.
Hatırlatamız: Anatoliy Kobzar 2024 senesi saban ayınıñ 5-nde işğal etilgen Qırımda qanunsız sürette tutuldı. rusiye uquq qoruyıcıları onıñ bulunğan yeri aqqında malümatnı çoq vaqıt gizley ediler. Tek onlarca yayın, QRM-niñ muracaat ve sistemli advokatlıq kampaniyasından soñ FSB onıñ apishanege alınğanını ve işğal etilgen Qırımnıñ mahsus bloklarında ve SİZOlarında tutulğanını tasdıqlamağa mecbur oldı.
Şimdiki vaqıtta o, “devlet satqınlığı”nda uydurılğan qabaatlavlar sebepten Aqmescitniñ №2 SİZO-sında tutula. Oña 20 yılğa qadar apis cezası üküm etile bile.
Kerekli tibbiy yardım kösterilmemesi, tutuluv yerini gizlemesi, beden zorbalıq ve vatandaşlarğa nisbeten işkence halqara gumanitar uquqınıñ qaba bozuluvları ola ve insaniyetsizlik areket tarzı ve işkence kibi tanıla bile – Qırımtatar Resurs Merkezi qayd ete.