Orta uzaqlığına uçqan ukrayin insansız uçaq aletleri Ukrayina cenübinde rusiye ordusınıñ logistikasını qıyınlaştırdı ve işğal etilgen Qırımnıñ teminlevi içün meseleler yarattı. Bu aqqında Politico neşiri haber ete.
Olarnıñ malümatına köre, Ukrayina ücümleriniñ esas maqsadlarından biri rusiyeni Mariupol ve Melitopolden işğal etilgen topraqlarnen bağlağan R-280 “Novorossiya” trassası oldı. Bu yol Qırımdaki rusiye ordusınıñ, em de Herson ve Zaporijjâ vilâyetleriniñ işğal etilgen topraqları içün müimdir.
“Politico” yazğanına köre, baarniñ başından berli ukrayin quvetleri rusiye ava mudafaasına bir sıra muvafaqiyetli darbeler endirdi, bu ise uçaqlarğa işğalcilerniñ arqasında daa teren areket etmege imkân berdi. Hususan, dronlar cenk safından 100 kilometr uzaqlıqta yerleşken strategik emiyetli logistika marşrutlarına irişmege imkân berdi.
Neşirniñ qayd etkenine köre, naqliyat infrastrukturası, anbarlar, komandanlıq noqtaları ve Ava Mudafaası sistemalarına qarşı muntazam ücümler ukrayin uçucısız sistemalarınıñ qabiliyetiniñ artqanını ve olarnıñ istisal miqyasınıñ artqanını köstere.
Böyle darbeler rusiyeniñ askerler, silâ ve tehnikanı cebege avuştırmağa imkânını sıñırlay. Neticede, cenüpte rusiye ordularınıñ ilerilemesi bayağı yavaşladı.
Hatırlatamız: evelden Ukrayina Mudafaa Nazirligi ve Ukrayina Silâlı Quvetleriniñ Baş ştabı duşmannıñ arbiy logistikasına ücüm programması kenişletilgeni aqqında bildirgen ediler. Ukrayina prezidenti Volodımır Zelenskıy yañı uzaq mesafeli operatsiyalarnıñ azırlanuvını ilân etip, rusiye açqan cenkniñ fiyatını öz zararları içün is etüvi kerek olğanını qayd etti.