Vaqtınca işğal etilgen Qırımda qural ayınıñ 9-na arbiy parad ve diger kütleviy tedbirler keçirilmeycek. İşğalci akimiyet “Ölümsiz polk” yürüşiniñ teşkil etilmesinden de vazgeçti.
Bunı işğal etilgen Qırımnıñ “başı” Sergey Aksönov bildirdi, qararını “telükesizlik sebeplerinen” añlattı.
Bu qarar, yarımadada rusiye işğalcileriniñ arbiy infrastrukturalarına muntazam ücümleri sebebinden, pek müim körüne. Soñki aylar devamında Qırımda rf silâ anbarlarına, qoruv-qoruq sistemasına, ava limanlarına, gemilerine ve diger arbiy obyektlerine defalarca ücümler qayd etilgen edi. İşğalci memuriyet, atta ananeviy propagandalı resim içün telüke çekmege daa az azır körüne.
Aynı zamanda Aksönov tedbirler “başqa formatta” keçirilecek, dep bildirdi. İşğalci akimiyetniñ tecribesi köstergenine köre, böyle laflarnıñ arqasında bala ve gençlerniñ arbiyleştirilüvi ve arbiy teşviqatı köterile.
Soñki vaqıtları Qırımda böyle teşebbüsler qayd etildi:
Bağçasarayda işğalciler balalar içün arbiy lagerde 10 künlik toplaşuv teşkil ettiler, oña işğal etilgen Qırım, Herson vilâyetiniñ bir qısmı ve rusiye federatsiyasınıñ territoriyasından 120 mektep talebesi ve student celp etildi;
“Artek” bala lagerinde yañı “tasil kursları” açıldı, olarnıñ çerçivesinde ösmürlerge uçaqlarnı idare etmege ögreteler;
İşğal etilgen yarımadada “Qızıl qaranfil” aktsiyası başlandı, onıñ devamında “SVO” iştirakçileri ve Ekinci cian cenkiniñ veteranlarına qol tutuv içün para toplanıla.
Bundan ğayrı, arbiy sıñırlavlar rusiyege de tesir etti. rusiye Mudafaa nazirligi qural ayınıñ 9-da moskvada keçirilecek paradnıñ sıñırlı formatta keçirilecegini bildirdi. “Şimdiki ameliy vaziyet” sebebinden, onda arbiy tehnika kolonnası, Suvorov ve Nakhimov oquv yurtlarınıñ talebeleri ve kadet korpusları iştirak etmeycek.
rusiye akimiyeti qural ayınıñ 9 kününi teşviqat aleti olaraq qullanmağa devam etkeni içün, Qırımnıñ işğalci memuriyetinde, arbiy obyektler muntazam sürette ücüm etilgen yerlerde arbiy küç köstermek pek telükeli olğanını añlaylar.