69 yaşındaki Ğalına Behter, rusiye akimiyeti onı devlet hainliginde qabaatlap, Aqmescitteki №1 SİZO-da kritik alda buluna. Bunı “Memorial” uquq qorçalayıcı teşkilâtı bildirdi, o, mabüsniñ kameradaşlarınen bağ tutqan faalcige atfı ete.
“Qadınnıñ ihtimal dementsiyası bar: o, ara-sıra insanlarnen subetleşmey ve öz-özüne yardım etip olamay. Behter de aştan vazgeçti, ve kameradaşları küç-quvet qullanıp onı aşatmağa mecbur olalar. Olarnıñ aytqanına köre, “kaçmasın dep” onı masa başında tutmaq kerek. Pensionerniñ ağırlığı kritik derecede alçaq, “Memorial” dep bildire.
Şaatlarnıñ aytqanına köre, qadınnıñ sağlıq vaziyeti apishanede bulunğan vaqıtta fenalaştı. 2025 senesiniñ yazında, kameradaşlarınıñ aytqanına köre, onıñ dementsiya alâmetleri yoq edi.
Faalci Dariya Kostromina da Behterniñ aman-aman aşamağanını ve öz başına baqıp olamağanını bildirdi. Onıñ aytqanına köre, kameradaşları oña aş bere, aşnı parçalay ve onı sofra başında tutalar, o, qısmen aşasın dep. Bundan da ğayrı, o, adiy gigiyenağa riayet etmey ve er künlik faaliyetinde dezoriyentatsiyalaşa.
Hatırlatamız: Ğalına Behter 2026 senesi saban ayınıñ 5-nde “devlet satqınlığı” sebepten maküm etildi (275 rf ck). Cinaiy taqipniñ sebebi Ukrayina ordusına donat berilgen edi. Tutulğanğa qadar o, Zaporijja vilâyetiniñ işğal etilgen qısmındaki Raihenfeld (Plodorodne) köyünde yaşay edi.