Qural ayınıñ 14-inci, cumaaqşamı künü, Qırımtatar Milliy Meclisiniñ ofisinde Ukrayinağa iş ziyareti içün kelgen Türkiye Cumhuriyetiniñ tış işler naziriniñ muavini Ayşe Berirs Ekincinen körüşüv olıp keçti. Türkiye eyyetine Türkiyeniñ Ukrayinadaki Fevqulâde ve Vekâletli Elçisi Mustafa Levent Bilgen de qoşuldı.
Körüşüvde qırımtatar halqınıñ lideri Mustafa Cemilev, Qırımtatar Milliy Meclisiniñ Reisi Refat Çubarov, Meclis Reisiniñ muavini İlmi Umerov, Qırımtatar Resurs Merkeziniñ İdare Reisi, Qırımtatar Milliy Meclisiniñ azası Eskender Bariyev, Meclisniñ azaları Riza Şevkiyev, Gülnara Bekirova, Qırım musulmanlarınıñ Diniy idaresiniñ müftisi Ayder Rustemov, Qırım milliy amanlıq fondunıñ reisi Lenur Mambetov ve Ukrayinanıñ Arap ve musulman devletlerinen işbirligi meseleleri boyunca Mesleat şurasınıñ kâtibi Snaver Seytahlilev iştirak ettiler.
Körüşüv vaqtında Eskender Bariyev 2026 senesi Antaliya şeerinde keçecek BMT İqlim Deñişüv Konferentsiyası (COP) çerçivesinde global iklim muzakerelerinde tamır halqlarnıñ iştirak etüvini temin etüv meselesini köterdi.
O, Türkiye Cumhuriyeti Avstraliyanen beraber COP teşkilâtçıları olğanını ve muzakereler, esabatlar, mehanizmler ve istiqrarlı neticeler içün mesüliyetli olğanını qayd etti. Şunıñ içün, COP vesiqalarında yerli cemiyetler ve tamır halqlarnıñ aqları teñleştirilmesin dep, Türkiye Cumhuriyetiniñ vesiqalarnı azırlağanda tamır halqlarnıñ noqta-i nazarını köz ögüne alması istenildi, bu noqta-i nazarnı da tamır halqlarnıñ “Caucus” (halqara tamır halqları platforması) seslendirdi. Bu teşebbüske Avropa Birligi, İsviçre ve Yañı Zelandiya qoşuldı.
COP çerçivesinde tamır halqlarnıñ keniş iştirakini desteklemek, hususan tamır halqlarnıñ temsiliy organları içün COP-de közeticiniñ statusını alması içün qoşma bir protsedura olmadan maniasız iştirak etüvini temin etmek kerekligi de seslendirildi. Hususan, Meclisniñ Ukrayina tamır halqınıñ temsil organı olaraq iştirak etüvi aqqında söz yürsetildi.
“Ukrayinanıñ tamır halqları, hususan qırımtatarlar, qaraylar ve qırımçaqlar, COP çerçivesinde muzakere esnaslarında, hususan, programma şekillendirilgende ve mevzular azırlanğanda, ekspert olaraq iştirak etmek kerekler. Ekspert destek ve yardım köstermege azır olğanımız aqqında aytıldı”, – QRM-niñ İdare Reisi dep qayd etti.
Halqara temsil meselelerinden ğayrı, iştirakçiler rusiye tarafından qanunsız tutulğan Qırım siyasiy mabüsleriniñ vaziyetini ve olarnıñ azat etilmesi içün halqara ğayretlerniñ quvetleştirilmesiniñ zarurlığını muzakere ettiler.
Körüşüvden soñ Ayşe Berris Ekinci, Türkiye Cumhuriyeti bu meselelerni şahsiy nezareti altında tutacağına işandırdı.
Foto: Qırımtatar Milliy Meclisi