Qırımtatar Resurs Merkeziniñ resmiy saytı kene de haker ücüminiñ obyektine çevirildi. Vaqia neticesinde o vaqtınca bozuldı, amma programmacılarnıñ tez işi sayesinde saytnıñ kirişi ve çalışuvı tolusınen tiklendi.
Bu Qırımtatar Resurs Merkeziniñ malümat resurslarına maqsatlı kiber ücümlerniñ birinci vaqiası degil. Buña beñzegen vaqialar sistemalıdır ve teşkilâtnıñ insan aq-uquqları qorçalav faaliyeti sebebinden olıp keçeler.
Soñki ücümniñ ola bilgen sebebi – Qırımtatar Resurs Merkeziniñ vaqtınca işğal etilgen Qırımda, em de Herson ve Zaporijjâ vilâyetleriniñ işğal etilgen topraqlarındaki vaziyet aqqında doğru malümatnı vesiqalaştırmağa ve darqatmağa izçen işidir. Teşkilât basqılar, qanunsız tutuvlar, adam qaçıruvlar, siyasiy taqipler, askerleştirüvler ve halqara uquqlarnıñ diger bozulmaları aqqında malümatnı sistemalı sürette qayd ete.
QRM işiniñ müim qısmı – işğal etilgen topraqlardan eksklüziv şaatlıqlarnı toplanuv ve darqatuv, bu ise halqara cemiyetke Qırımda ve Ukrayinanıñ diger işğal etilgen topraqlardaki vaziyet aqqında kerçek malümat almağa imkân bere. İşte, bu faaliyet kremlniñ siyasiy basqıları fedalarınıñ taqdirine diqqat çekmege yardım ete.
Añlaşılğanına köre, böyle faaliyetler mustaqil malümatnıñ darqaluvını qapatmağa ve insan aqları teşkilâtlarınıñ işine tesir etmege tırışqan rusiye federatsiyası tarafından sistematik qarşılıqqa sebeptir.
Hatırlatamız, 2025 senesiniñ qural ayında, Qırımtatar halqınıñ genotsid fedalarınıñ hatıra kunü arfesinde QRM-niñ saytınıñ hostingi endi kütleviy ücümge oğray edi. O vaqıt, bu müim tarihqa bağışlanğan malümat aktsiyası devamında sayt bozuldı.
Bundan da ğayrı, 2025 senesiniñ orta küz ayında QRM meneceri Zarema Bariyevanıñ şahsiy Facebook saifesine ruhsetsiz kirmege areket etildi, ondan soñ rusiye matbuatında yalan malümat darqaldı, bunı teşkilât resmiy sürette red etti.
Qırımtatar Resurs Merkezi kiber ücümlerge ve malümat basımğa baqmadan öz faaliyetini devam ete. Endi sayt tolusınen tiklendi ve normal sürette çalışmaqta.
Ve, körünişke köre, ne qadar tırışsalar da, aqiqat ep bir onlayn şekilde tezce çıqa, ve biz er ukrayin topraqları işğalden azat etilmesi qadar çalıştıq da çalışacaqmız.