Bugün, çiçek ayınıñ 29-nci künü, Qırım siyasiy mabüsı Nasrulla Seydaliyev öz doğğan kününi esirlikte qutlay ete. Onıñ 67 yaşı toldura.Bu onıñ apishanede, evinden uzaqta ve sevimlilerini körmege imkânsız, dörtünci doğğan künüdir.
Qırımtatar Resurs Merkeziniñ hadimleri Nasrulla Seydaliyevge sağlıq, çıdamlılıq ve iman tileyler. İşğalci «akimiyet» tarafından qanunsız serbestliginden marum etilgen er bir insannı hatırlaymız, ve adalet ğalip çıqacağına inanamız. Nasrulla mıtlaqa onı beklegen soy-soplarına qaytacaq.
Allah baht, sabır ve sağlıqnı bersin!
QRM bütün siyasiy mabüslerniñ aqları içün turmağa devam ete ve biz olarnıñ er birini mıtlaq evlerine qaytacağına işanamız.
Hatırlatamız: 2022 senesi saban ayınıñ 4-nci künü qırımtatar Nasrulla Seydaliyev işğal etilgen Qırımda Noman Çelebicihan batalyonında iştirak etüv dava sebebinded tutuldı. Boş aynıñ 30-da işğal etilgen Qırımnıñ «makemesi» siyasiy mabüs Nasrulla Seydaliyevniñ ükümini ilân etti. İşğalciler onı 9 yılğa mahküm ettiler.
Bu «dava»daki qabaatlavlar «gizli şaatlarnıñ» şaatlıqlarına ve rusiye havfsızlıq küçlerinen faal işbirlik etken ekspertler deyilgenlerniñ neticesine esaslana. İşniñ baqılması halqara uquq normalarını qattı bozıp olıp keçti – qayd etmek kerek
Nasrulla Seydaliyev daima Mayma (Altay Cumhuriyeti) tüzetiş koloniyasınıñ ceza izolâtsiyası bölüginde (ŞİZO) köçürilme ve qoranta ve yaqınlarını ziyaret aqqısız tutula. Bundan ğayrı, onı «ekstremist ve terrorist» dep adlandırılğanlar cedveline qoştılar, qanunsız cezasını keçirgen soñ, onı Özbekistanğa sürgün etmeknen qorquzdılar – Qırımtatar Resurs Merkezi daa haber etti.