Qırımnıñ Vaqtınca İşğal etilgen territoriyasına balalar içün seyaatlarnı teşkil etken Finlândiyanıñ “Sun Ray” ticaret degil teşkilâtı Helsinki şeer akimiyetinden €43,5 biñ miqdarında grant aldı. Bu para keçken ve o birisi yıl devamında ayırıldı, teşkilât ise ilk arizasını 2024 senesi arman ayında, yani meydanğa kelgeninden tek üç ay keçken soñ berildi.
“Helsingin Sanomat” adlı fin neşiriniñ teşkerüvine köre, para işğal etilgen Qırımdaki «Artek» rus lagerine fin balalarınıñ seyaatları içün ayırılğan edi. Bu vaqia cemaat arasında müim rezonans doğurdı, ve araştırma derc etilgen soñ, Helsinki şeeriniñ meri Daniel Sazonov açuvlanğanını bildirdi ve teşkilâttan añlatmalar talap etti, em de devlet subsidiyaları berüv qaidelerini közden keçirmege emir etti. Bundan ğayrı, Sazonov Finlândiya ükümeti kelecekte böyle işler boyunca qarışmaq içün qanun çıqaruv mehanizmlerini yaratmağa çağırdı.
«Bu açıqtan-açıq igrenç», – dep, Sazonov vaziyetni şerh etti ve böyle faaliyetnen oğraşqan teşkilâtlarğa iç bir yevro devlet destegi berilmemek kerekligini qoştı.
Belli ki, «Sun Ray» cemaat teşkilâtına rusiye qurulışlarınen işbirliginen belli olğan Estoniyada doğğan Viktoriya Tağanova yolbaşçılıq ete.
Bu vaqia rusiye rejiminen işbirlik etken ve Qırımnıñ rusiye işğaliniñ qanunleşmesine isse qoşqan teşkilâtlar tarafından peyda olğan havfnı tasdıqlay. Böyle teşebbüslerge, atta beklenilmegen alda, maddiy yardım kösterip, devletler işğal etilgen territoriyalarda qanunsız akimiyetniñ pekitilmesine isse qoşıp olalar, bu ise halqara uquqnı doğrudan-doğru bozmaqtır. QRM böyle teşkilâtlar üzerinde daa yaqından nezaret etmege ve kelecekte böyle vaqialarnıñ ögüne keçmek içün mehanizmler yaratmağa çağıra – Qırımtatar Resurs Merkezi qayd ete.