rusiye havfsızlıq küçleri Qırım siyasiy mabüsi Ernest Seytosmanovnı “Vladimirskiy tsentral” apishanesinden qanunsız olaraq Sibirde yerleşken İrkutsk vilâyetiniñ Angarsk tüzetiş №2 koloniyasına avuştırdılar. Bu aqqında siyasiy mabüsniñ dostları « Qırım birdemligi»ne onıñ mektübine esaslanıp haber ettiler.
«Seytosmanov şimdiki vaqıtta mektüp yazıp, soy-soplarına telefon etip olamağanını qayd etti », – haberde yazıla.
Hatırlatamız: 2023 s. qural ayınıñ 24 künü işğalciler «Hizb ut-Tahrir» işindeki şahs olğan Ernest Seytosmanovnı qanunsız 18 yılğa maküm ettiler, birinci dört yılnı apishanede keçirmek kerek, em de azat etilüvinden soñ 1,5 yıl serbestlikniñ sıñırlanmasına maküm ettiler.
Bu «iş»teki qabaatlavlar «gizli şaatlarnıñ» şaatlıqlarına ve rusiye havfsızlıq küçlerinen faal işbirlik etken ekspertler aytqanlarnıñ neticelerine esaslanğanını qayd etemiz. İşniñ baqılması halqara uquq qaidelerini qattı bozıp olıp keçti.
Qırımtatar Resurs Merkezi öz qatiy narazılığını bildire ve bu qarar qanunsız, siyasiy sebeplerden ve cinaiy olğanını bildire. rusiye federatsiyasınıñ böyle siyaseti işğal etilgen Qırım grajdanlarınıñ siyasiy inançlarına qarşı küreşniñ numayışıdır.
Qırımtatar Resurs Merkezi işnen bağlı şahısnıñ ükminiñ lâğu etilmesini ve diger siyasiy mabüslerniñ tez vaqıtta azat etilmesini talap ete.