Qırımtatar Resurs Merkeziniñ İdare reisi ve Qırımtatar Milliy Meclisiniñ azası Eskender Bariyev, eñ azdan beş qanunsız maküm etilgen Qırım siyasiy mabüsi – Volodımır Yekimenko, Oleksandr Jukov, Oleksiy Tomaşev, Rustem Merasov, Yevğen Melnıçük çoq vaqıt devamında Saratov vilâyetiniñ Pugaçov şeerindeki №4 (UFSİN) tüzetiş koloniyasınıñ ceza izolâtorında (ŞİZO) buluna ediler.
Eskender Bariyevniñ aytqanına köre, müessise memuriyeti olarğa izolâtsiya ameliyatını muntazam sürette qullana, ahlâqiy basım ete ve mahsus Qırımnıñ siyasiy mabüsleri içün dayanılmaz tutuv şaraitni yarata.
«Hususan, Qırım siyasiy mabüs Rustem Murasovnı apishanege kelgen soñ deyerlik deral ŞİZOda yerleştirdiler. Bu vaqıt devamında o, 10 kg yaqın – 72-den 62 kg-ğa qadar ağırlıqnı coydı. Tutuv şaraitleri pek ağır: qızdıruv kesilgen, avale alâqa, antisanitariya, kemiriciler bar. ŞİZOda bulunğanı sebebinden o, qorantasından haberler almağa imkânsız qala. Bundan ğayrı, onıñ sağlığınen meseleleri bar – qan basımı yüksek ve daima baş ağırları bar, lâkin tibbiy yardım aslında berilmey», – QRMniñ İdare reisi dep qayd etti. Bundan ğayrı, narkotik taşuvda qabaatlanğan siyasiy mabüs Volodımır Yakimenko kremlniñ nezareti astında olğan «makeme» tarafından 15 yıl ve 6 ayğa maküm etildi. Onı aylarnen PKT ya da ceza izolâtorında (SİZO) tutalar. rusiye müstemlekesi idaresi onıñ özara ayırılma müddetlerini temelsiz uzata, em de siyasiy mabüsni suvuq, buzlu tabanda yuqlamağa mecbur ete, yataqta yatmağa yasaq ete. Volodımır suvuqta, kerekli urba ve ayaqqapsız, aş sıñırlanğan ve berüv almaq imkânsız qalmağa mecbur ola. Bu ise onıñ kerekli tibbiy yardım olmağanından sağlığınıñ bozulmasına ketire.
«Koloniya idaresiniñ istegine köre, 38 yaşındaki siyasiy mabüs Oleksandr Viktorovıç Jukov, uydurma «casuslıq» qabaatlavlarınen 12 yılğa maküm etildi, em de Belorus grajdanı Oleksiy Tomaşev Aqyar işğal «makemesi» tarafından 14 yılğa qadar qattı rejimli koloniyağa maküm etildi.
Şimdi siyasiy mabüslerniñ ekisi de evlerinden biñlernen kilometr uzaqlıqta, Saratov vilâyetindeki № 4 (UFSİN) tüzetiş koloniyasında etmegen cinayetleri içün qanunsız cezalarını keçireler», – uquq qorçalayıcı dep qayd etti.
Söz sırası, işğalciler tarafından «casuslıq» dep adlandırılğan şey içün 17 yılğa maküm etilgen Aqyar sakini Yevğen Melniçuk da Pugaçov şeerindeki № 4 (UFSİN) koloniyanıñ ceza izolâtorında bir qaç afta tutuldı. Onıñ taqip etilmesi onıñ açıq ukrain tarafdarı olğan mevamınen bağlıdır, ve o, koloniyadaki diger ukrayin siyasiy mabüslerine yardım etken içün, soñunda makeme cezasına tüşti, – Bariyev daa qayd etti.
«Kene de qayd etmek isteyim: uzun vaqıt ceza izolâtorında, kerekli tibbiy yardımsız, aşayt sıñırlanmasınen, suvuq ve antisanitar şaraitte siyasiy mabüslerni tutmaq zalım ve insaniyetsiz munasebet olaraq sayıla bile.
Dünya tek faktlarnı yazıp almaq ve raatsızlıq bildirmek degil de, qararlı areket etmek ve kremlniñ grajdan reinelerini azat etmege yardım etmek kerek», – QRM İdare reisi qayd etti.
O, bu adamlarnıñ episi cinayetçilikke iç bir vaqıt alâqası olmağanını, olarnıñ taqipleri tek siyasiy hususiyeti olğanını qoştı.
«Kene de halqara cemiyetni qanunsız tutulğanlarnı tez vaqıtta azat etmek maqsadınen işğalci devletke basımnı arttırmağa çağırayım, çünki esirlik tek siyasiy mabüsni degil de, özlerini «parallel esirlikte» tapqan bütün qoranta azalarını da öldüre.
«Yarın öz sevimli adamınıñ qaytıp kelmesini beklegen er bir adam olarnı qattı quçaqlağan alda olsun», – dep, öz fikirini yekünledi uquq qorçalayıcı.