Qırımtatar Resurs Merkeziniñ malümatına köre, Qırım işğal etilgen soñ, rusiye federatsiyası yarımadada mustaqil jurnalistlerni ve grajdan faalcilerini muntazam sürette taqip ete.
2014 senesinden başlap, ihtisasiy jurnalistler Qırımda çalışmağa devam ete ediler, lâkin basım artqan sayın, çoqusı Ukrayinanıñ qıtа qısmına ketmege mecbur oldılar. Bazıları qalıp gizliden ukrayin matbuatı içün malümat azırlay ediler. Aynı vaqıttа yarımadada grajdan jurnalistikası da inkişaf etip başladı: yerli sakinler tintüvler, tutuvlar ve hususan asıl qırımtatar halqınıñ vekillerine nisbeten etilgen tintüvlerni, yaqalavlarnı ve diger insan aq-uquqları bozuvlarını qayd ete ediler.
Faalcilerniñ evlerinde tintüvler vaqtında ve «makeme oturışı» dep adlandırılğan vaqıtta rusiye havfsızlıq küçleri jurnalistlerniñ işine sıq-sıq keder ete ediler — olarnıñ elinden telefon ve fotoapparatlarnı yıqtılar, küç-quvet qullandılar.
Vaqıt keçtikçe vaziyet tek beterleşti. QRMniñ malümatına köre, kremlniñ siyasiy mabüsleri arasında bir sıra faalciler, vatandaş jurnalistler ve blogerler, hususan «Qırım birdemligi» teşebbüsinen bağlı olğanlar bar. Aslında 25 Qırım jurnalisti işğal akimiyeti tarafından taqip etildi, olardan 16 qırımtatardır.
Şimdi apshanede 21 Qırım jurnalisti ve faalcisi: Aziz Azizov, Amet Suleymanov, Asan Ahtemov, Volodımır Dudka, Vilen Temeryanov, Ğenadiy Osmak, Dmıtro Ştıblikov, Ernes Ametov, İrına Daniloviç, İrına Levçenko, Marlen Asanov, Osman Arifmemetov, Oleksiy Bessarabov, Remzi Bekirov, Ruslan Suleymanov, Rustem Osmanov, Rustem Şeyhaliyev, Seyran Saliyev, Serğiy Tsığipa, Server Mustafayev, Timur İbragimov.
Daa dört adam – Nariman Celâl, Mıkola Semena, Nariman Memedeminov ve Vladıslav Yesipenko – almaşuvlarnıñ bir qısmı olaraq ya da qanunsız apske alınuv müddetlerini bitirgen soñ azat etildi.
Qırım asğariy söz serbestligi olğan yerge çevirildi, 2022 s. rusiye federatsiyasınıñ tolu miqyaslı istilâsından soñ mustaqil jurnalistikağa qarşı basqılar tek küçlendi.
Qırımtatar Resurs Merkezi, ukrain jurnalistleri öz faaliyetini havfsız sürette alıp barsınlar, taqiplerde qabaatlılar cevapkârlıqqa çekilsinler dep halqara cemaatçılıqnı işğalci devletke basımnı arttırmağa çağıra.