Qırımtatar Resurs Merkeziniñ ofisinde «Le Monde» frenk neşiriniñ jurnalistlerinen körüşüv olıp keçti. QRMniñ idare reisi Eskender Bariyev ve QRMniñ meneceri Zarema Bariyeva intervyu berdiler. Qırımda, Herson ve Zaporojye vilâyetlerinde grajdanlarnıñ siyasiy sebeplerden taqip etilmesi, em teşkilâtnıñ faaliyeti, em de rusiyeniñ uquq bozuvları aqqında laf ettiler.
Eskender ve Zarema Bariyevler repressiyanıñ yañı yönelişleri, siyasiy mabüslerniñ azat etilgen soñ ğayrıdan apishanege alınuvları, qoranta repressiyaları, qadınlarnıñ taqip etilmesi, zorbalıqlı ğayıp etüvler, apishanege alınğan yerlerde ölümler aqqında tafsilâtlarnen ayttılar. Qırımtatar Resurs Merkeziniñ İdare reisi qırımtatarlarnı sürgün etüvi ve rusiye grajdanlığından marum etmek ameliyatına diqqat çekti, bu ise insanlarnıñ tuvğan Qırımğa qaytmaq imkânsız Orta Asiyağa mecburiy köçürilme telükesini yarata.
QRMniñ vekilleri 2025 s. ve 2026 s. birinci kvartal devamında cenk cinayetleri ve insan uquqları bozuvlarınıñ vesiqalaştırılması aqqında malümatnı da berdiler. İşğalci akimiyetniñ kimlik ve fikir farqını cinaiy cezağa oğratqanı, tınç sakinlerge qarşı sistemalı repressiyalar qullana, şimdiki işlerde kösterildi.
«Le Monde»niñ Facebookta aman 6 million, Instagramda ise 2,7 milliondan ziyade izleyicisi bar, olarnıñ saytını bütün dünyadan adamları oquylar. Böyle subetler sayesinde Qırımtatar Resurs Merkezi işğal etilgen Qırım, Herson ve Zaporijja vilâyetlerindeki vaziyet aqqında aqiqatnı bütün dünyağa yetkizmege imkân bere.
Bu, büyük halqara matbuat vastalarınen işbirlikniñ müimligini qayd ete, çünki Qırım mevzusı cian cemiyetiniñ diqqat merkezinde qalmalı. Qırım siyasiy mabüslerniñ azat etilmesi oğrunda küreş tek Ukrayinada degil de, halqara seviyede olmalı. Böyle subetler dünyağa siyasiy mabüslerniñ muayyen ikâyeleri aqqında aytmağa yardım eteler, olar aqqında bilsinler, vaziyetke tesir ete bileler ve kremlniñ bütün tınç esirlerini azat etmege isse qoşa bileler.
Böyle malümat imkânlar vastasınen QRM Qırım mevzusını dünya seviyesinde kötere ve teşviqat ete. Teşkilât halqara cemiyetniñ daa ziyade diqqatını celp etmek ve şimdiki vaqıtta işğal etilgen topraqlarda ya da rusiye federatsiyası territoriyasında tutuv yerlerinde bulunğan er bir siyasiy mabüsni azat etmek içün elinden kelgen er şeyni etmek içün bu yönelişte faal inkişaf etmege devam etmege planlaştıra.