Qırımtatar Resurs Merkeziniñ meneceri Zarema Bariyeva Aqmescit şeeriniñ SİZO-1 ve SİZO-2 yerinde «inkomunikado» statusında olğan daa eki qırımlı qadın Evelina Melniçuk ve Tetâna Dâkunovska tapılğanı aqqında haber berdi.
«2025 s. boş ayında Qırımtatar Resurs Merkeziniñ İdare Reisi Eskender Bariyev, haber alınğan malümatqa köre, Ukrayina vatandaşlarını vaqtınca işğal etilgen Qırımda, rf KK (275 q.) “devlet hainligi” sebepten, 8 qanunsız tevqifi aqqında ayttı. O vaqıttan berli QRM komandası bu adamlarnı faal qıdırmağa başladı. 4 ay devamında çoqusı tapıldı, ve olarnıñ ikâyeleri bizim resurslarımızda tafsilâtlarnen tasvirlendi.
Bugün o, Aqmescitniñ SİZO-1 ve SİZO-2-de uzun vaqıt devamında «inkomunikado» statusında olğan daa eki Qırım qadını tapılğanı aqqında haber berdi. SİZOda tutulğan Qırım siyasiy mabüsleriniñ cedveli daa eki Qırım qadınınıñ — Yaltadan Evelina Melniçuk ve Aqyardan Tetâna Dâkunovskayanıñ adlarınen toldurıldı.
«16 aydan ziyade Yalta sakini Evelina Melniçuk “inkomunikado” statusında ola edi. Qırım qadını çoq yıl devamında eki memlekette – Sloveniyada ve Ukrayinada yaşağan edi. 2024 s. boş aynıñ 20-ncı künü qadın ve onıñ 79 yaşındaki anası işğal etilgen Qırımdan Voronijge, ondan soñ Belorus içinden Sloveniyağa ketti. Voronejge barğan soñ, Evelina anasınen beraber gecelemek içün bir musafirhanede qaldılar, lâkin 2024 s. boş aynıñ 21-22 gecesi Yalta şeeriniñ sakinini FSB tutuldı», — QRM müdiri dep qayd etti .
O, başı üstünde torba, ellerinde qancalar olğan Evelinanı ve anasını maşınağa oturtıp, Aqmescitke qaytarğanlarını ikâye etti. Esli qadın qızını soñki kere Aqmescitte Franko bulvarındaki FSB binasınıñ basamaqlarında körgen edi. Çekken stressten soñ, Evelinanıñ anası 3 aydan soñ, 2025 s. kiçik ayda vefat etti. Bütün vaqıt devamında onıñ qorantası 58 yaşındaki qadınnıñ qayda olğanını bilmey edi. Tamam keçken künlerde Evelina Aqmescitte, SİZO-1-de olğanını bildik.
Ebet, bütün vaqıt qorantasınen qadınnıñ alâqası olmay edi, em de FSB hadimleriniñ daima psihologik basımında 16 ay devamında bütünley tecrit etilüvde olıp, advokatnıñ qorçalavına da işanıp olamay edi. Evelina 275-nci qısım «devlet hainligi» boyunca qabaatlandı. rusiye federatsiyasınıñ cinaiy kodeksine köre, bu qısımda 12 yıldan 20 yılğace apishanege apis ya da ömürbillâ apishanege alınuv cezası közde tutula.
«43 yaşındaki Aqyar sakini Tatyana Dâkunovskayanı 2024 s. arman ayınıñ 14 künü Aqyar FSB hadimleri qadınnıñ evinde tintüvden soñ tuttılar. Qadın 275-nci qısım «devlet hainligi» boyunca qabaatlandı. Qadın 19 aydan ziyade inkomunikado statusında edi. Soy-sopları onı er yerde qıdırdıra ediler, lâkin yarımadanıñ akimiyetine etilgen bütün soravlarğa bir cevap bergen ediler: böyle adam cedvelinde yoq. Tek keçken künlerde Aqyar sakini Tetyana Dâkunovskayanı Aqmescitniñ SİZO-2-de qanunsız tutqanını bizge işğalci menbalarımız tasdıqladı», — Bariyeva qayd etti. Onıñ aytqanına köre, vaqtınca işğal etilgen Qırımdaki şimdiki aqiqatlarda, apishanege alınmaq ve soñra “inkomunikado” statusında tutmaq içün siyasiy faalci olmaq kerekmey. İşğalcilerniñ quvet qurulışları, başqa alda hususiy ömürniñ bir qısmı sayılacaq adiy kündelik areketlerni çoq vaqıt cinayet olaraq baqalar. Cemaat yerlerinde, toylarda, atta öz maşınasında pencereleri açıq olğanda Ukrayin yırlarını icra etmek ya da diñlemek, urbada, içki elementlerde, manikürde ya da yarlıqlarnıñ dizaynında sarı ve kök tüslerni qullanmaq çaquv etmek ve soñra tutmaq içün sebep ola bile.
Zarema Bariyeva qayd etkenine köre, layklar, eski yazmalarnıñ repostları, ya da zümrelerdeki tefsirler zorbalıqqa sebep ola bile. FSBniñ havfsızlıq hadimleri çat odalarını ve içtimaiy ağlarnı közetip, atta bir qaç yıl evelde yazılğan haberler esasında cinaiy işlerni başlaylar. Ukrayinanıñ topraq bütünligini yaqlamaqnı bildirgen ibareler sıq sebeptir.
“Çaquv yazuvı pek tarqaldı. Yaqalanğan Qırım qadınlarınıñ çoqusı işğalci memleketke sevginen tolu qomşularından tenqidlerniñ qurbanı oldılar. İnsannı qomşunıñ qarğışı yaqalamaq ya da tükânda ya da avtobus toqtavında tenqidiy olaraq «şubeli» laqırdılar eşitip ola. Ava mudafaası areketlerini ya da infrastruktura obyektlerindeki vaqialarnıñ neticelerini telefonda tasvir etmege tırışmaq çoq vaqıt «mahsus hızmetlerge malümatnı bermek», «casuslıq» ya da «satqınlıq»ta qabaatlavlarnen bite. Asılında, yarımada sakinleri Evelina ve Tetânanıñ başına öyle oldı», — uquq qorçalayıcı dep qayd etti.