Çiçek ayıniñ 7-nci künü, salı künü, Kıyivde Qırımtatar Resurs Merkezi ve Strategik Araştırmalar Milliy İnstitutı (SAMİ) işbirlik memorandumını imzaladılar.
Toplaşuvda iştirak ettiler:
Oleksandr Bogomolov – SAMİniñ direktorı, filologiya ilimleri doktorı, üyken ilmiy hadim;
Eskender Bariyev – Qırımtatar Resurs Merkeziniñ idare reisi, Qırımtatar Milliy Meclisiniñ azası;
Vâçeslav Potapenko – Merkezniñ direktor-reberi muavini, iqtisadiyat ilimleri doktorı, coğrafik ilimlerniñ namzeti, üyken ilmiy hadim;
Tetyana Savçuk – Qırımtatar Resurs Merkeziniñ komunikatsiya meneceri;
Valentina Mancula – Qırımtatar Resurs Merkeziniñ kommunikatsiya meneceri.
İmzalanğan memorandum ilmiy ve analitik saalarda işbirlikniñ inkişafını közde tuta. Hususan, o birlikteki araştırmalarğa, konferentsiyalar, seminarlar ve tögerek masalarnıñ teşkil etilmesine, tecribe almaşuvına, em de analitik ve usuliy materiallar azırlavğa aittir.
Eskender Bariyevniñ qayd etkenine köre, Qırımtatar Resurs Merkezi içün bu işbirlik birinciden vaqtınca işğal etilgen topraqlarnıñ işğalden azat etilmesi ve reintegratsiya ceryanlarını ögrenüv köntekstinde müimdir.
«Qırım ve diger vaqtınca işğal etilgen topraqlarnıñ işğalden azat etilmesi, em de reintegratsiya ve restavratsiya ceryanları boyunca çezimlerni işlep çıqaruvda küçlerimizni birleştirmek pek müimdir», – Eskender Bariyev qayd etti.
Onıñ aytqanına köre, QRM endi emiyetli ekspert potentsialına ve azırlanğan taliliy bazağa saiptir, hususan, uquq, iqtisadiyat ve integratsiya ceryanları saalarında ukrayin alimleri iştiraginen ekspert keneşleriniñ işi sayesinde. Bu inkişaflarnı SAMİniñ imkânlarınen birleştirmek akimiyet, siyasetçiler ve devlet sektorı içün faydalı olğan daa teren talil materiallarını yaratmağa imkân berecek.
Bariyev etno-milliy siyasetni işbirlikniñ ayrı müim saası olaraq qayd etti. O, işğal etilgen Qırımdaki vaziyetni sistemalı sürette vesiqalaştırğan ve em milliy, em de halqara seviyede tamır halqlarnıñ aqlarını qorçalağan teşkilât olaraq, ilerideki araştırmalar içün esas malümat menbası olaraq hızmet ete bilecegini qayd etti.
Bundan da ğayrı, olar Rusiye işğaliniñ ekologik aqibetlerini, hususan Qırımnıñ etraf müitine ketirilgen zararnı araştırma üzerinde birlikte çalışmaqnı planlaştıralar.
Bariyevniñ fikrince, bu meseleler devlet siyasetiniñ şekillenmesi ve milliy kimlikniñ saqlanması pek müimdir.
«Kelecek nesiller aqqında deymiz – ukrayin ve qırımtatar kimligini saqlap qalmağa usulı aqqında, hususan tış memleketlerge ketmege mecbur olğan vatandaşlar, olar Ukrayinanen bağlarını coymasınlar ve onı tiklemek içün qaytsınlar», – dep qayd etti.
QRM ve SAMİ arasındaki işbirlik Qırım, vaqtınca işğal etilgen topraqlar, Ukrainanıñ tamır halqlarınıñ aqları boyunca ekspert talilini pekitmege ve strategik qararlarnı işlep çıqmağa yardım etecek.