Belli olğanı kibi, rusiye esirinde 10 ukrain vatandaşı, şu cümleden qırımtatar Milliy Meclis reisiniñ muavini Nariman Celãl qaytarıldı.
Bu aqta Ukraina prezidenti Vladimir Zelenskiy haber etti.
‘Nariman Celãl, qırımtatar Milliy Meclis reisiniñ muavini Qırımda tap 2021 senesi tutuqlanğan edi’,- qayd etti o.
Ukraina prezidenti esirler almaşuvını kerçekleştirmege yardım etkenlerge minnetdarlığını bildirdi.
‘Şundan da ğayrı, bu insanlarnı evlerine qaytarılması içün ğayret etken Vatikannı qayd etmege ister edim. Özümizinkilerni episini mıtlaqqa azat etermiz!’-dedi Zelenskiy.
Hatırlatamız ki, 2021 senesi 3-4 sentãbr künü Qırımda RF işğalcı hakimiyet organları bir sıra tintüvler keçirgen soñ Nariman Celãl ve daha 4 ukrainni tutuqladılar. Celãl gas borunıñ patlatılmasında qabaatlanıp, 17 yıl hapis, 700 biñ ruble cöreme, bir yıl ve 6 ay azatlıq sıñırlamasına mahküm etildi.
Nariman Celãlnı ve yaqınlarını evine qaytmasınen can-yürekten hayırlaymız.