Cuma künü, 22 martta, QRM Ukrainada ‘Fridrih Naumannıñ azatlıq oğrunda fondu’ Temsilciliginiñ destegi ile Zakarpatyede ‘Qırım istiqbali’ III Strategik forumnıñ işini başladı.
QRM forumnıñ ekspert terkibini kenişletmege çalışır eken, mutehassıslarnı işimizge qoşulmağa davet ete. Forumda Ukraina akademik sahasınıñ temsilcileri, Qırım Platforması ekspert ağınıñ ekspertleri, cemaat erbapları, jurnalistler iştirak eteler. Alimler arasında yuridik, coğrafik, iqtisadiyat, siyaset, içtimaiy, tarihiy, pedagogika ilimler namzetleri bar.
Forum çerçivesinde ekspertler Qırım Platformasınıñ işini talil etecek, faaliyetiniñ inkişafı içün yañı ğayelerini muzakere etecekler. Şundan da ğayrı iştirakçiler ‘Qırım kelecegi’ advokatsıon aktsıyaları ve kampaniyalarını işlep çıqarmaqnen meşğul olacaqlar.
QRM reisi Eskender Bariyev tedbir iştirakçilerini forum işi başlanmasınen tebriklep, qısqadan ögündeki iş planları haqqında añlattı.
Birinci kün Ukrainada ‘Fridrih Naumannıñ azatlıq oğrunda fondu’ Temsilciligi leyhasınıñ meneceri İrina Starıvitskaya forum iştirakçilerine Ukrainada ‘Fridrih Naumannıñ azatlıqoğrunda fondu’nıñ faaliyeti ve yönelişleri haqqında tarif etti.
Eskender Bariyev halqara siyasiy sistema olaraq Qırım Platforması haqqında, çezilecek meseleler haqqında añlatıp, Qırım Platforması Ekspert ağınıñ iç siyaset leyhalarınıñ taqdimini keçirdi. İştirakçiler Reglament leyhasını gruppalarda muzakere etip, öz fikirlerini bildire bildiler.
Ekinci kün ise yuridik ilimler doktorı, QRM eksperti Boris Babin Qırım Platformasınıñ analitik malümatlarını taqriz etüv leyhalarını taqdim etti. Soñra da ekspertler mezkür vesiqalarını muzakere etip, öz noqta-i nazarlarını bildirdiler.
İşimizni devam etemiz!