Bugün, 20 mart künü qırımtatar edebiy tilniñ atası –İsmail bey Mustafa oğlu Gasprinskiyniñ 173 yıllığı qayd etile.
İsmail bey bütün ömrü devamında Rusiye imperiyasınıñ basqısı altında ezilgen tillerni qorçaladı. İlk türkiy gazeta sayılğan ‘Terciman’ neşri 35 yıl devamında, yani 1883 senesinden 1918 senesine qadar basıldı. Neşir türkiy halqlar menliginiñ yañıdan tiklenilmesine yardım etti.
Onıñ qalemi altından ‘Frenkistan mektüpleri’, ‘Afrika mektüpleri’, ‘Yıldız’ ve diger romanlar dünya yüzüni kördi.
Böyleliknen Gasprinskiy qırımtatar edebiy tilniñ belli hususiyetlerini şekillendirip, basqı altında qalğan halqlarnıñ medeniy-maarif inkişafına büyük isse qoştı.
İsmail Gasprinskiyniñ şahsiyeti hatıralamızda yaşamaqta, yañı nesillerni ilhamlandıra ve olarnıñ milliy menligini qaviyleştire.