QRM Qırımnıñ qadimiy adlarını qaytarılmasına doğrultılan ‘Adlarnı qaytarmaq- Qırımnı qaytarmaqtır’ adlı informatsıon kampaniyası çerçivesinde ukrain biznesinen işbirlikte bulunmağa devam ete.
Bundan evel Lvovdaki ‘Qırım azbarçığı’ adlı qavehane haqqında tarif etken edik ki, o yerde Qırım şeherleriniñ adlarını ve QRM-niñ informatsıon kampaniyasınen bağlağan QR kodlarnı bulundırğan tablolar peyda olğanını añlattıq.
Bügün ise teşebbüsimizge qoşulğan daha bir biznesnen sizni tanıştırmağa ister edik. Lvov şehrinde (Staroyevreyskaya soq., 22) yerleşken ‘Sofra’ qavehane. Aynı mında kerçek qırımtatar qavesini içip, Qırım lezetiti his etmek mümkün. Endiden soñ qave filcanı başında Qırım mesken yerleriniñ tarihiy adlarınen de tanış ola bilirsiz.
‘Qırımtatarlar içün qave emiyetli adet ve musafirçenlik köstergiçidir. ‘Sofra’ qavehanesi sizni tam bir qırımtatar qorantasında kibi qarşılarlar. Böyle etip, qısqa bir vaqıtqa olsa da, özüñizni Qırımda olğanı kibi duyarsız. QRM-niñ ‘Adlarnı qaytarmaq- Qırımnı qaytarmaqtır’ informatsıon kampaniyası sayesinde ise musafirlerimiz Qırım toponimiyası ve tarihı haqqında daha çoq bilecekler’,- dedi qavehane sahibi Elviye hanım.
Ukrain iş adamlarına añlı mevamları ve köstergen meraqları içün ayrıca teşekkür bildiremiz. Aynı böyle içtimaiy cehetten faal olğan biznes Qırımğa işğalden soñra qaytmalı.
Lvov şeheriniñ sakinleri ve musafirlerini ‘Sofra’ qavehanesini ziyaret etmege ve Qırım toponimiyası ve tarihınen yaqınca tanış olmağa davet etemiz.
#LIBERATECRIMEA kampaniyası QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Kampaniya mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.