Qırımda devamlı hastalıqtan soñ istidatlı yazıcı, belli tarihçı Oleksa Gayvoronskiy vefat etti.
Oleksa qırımtatar halqınıñ tarihına ölçelmez isse qoştı. Öz bilgilerinen ‘Azatlıq radiosı’, ATR kanalınıñ programmalarında ve Crimean Tatars derclerinde paylaşqan edi.
2010 senesi eki cıltlı ‘Eki qıta hükümdarları’(«Повелители двух материков») adlı emegi dünya yüzüni kördi. Mezkür kitaplarda Qırım hanlığı peyda olğan ve şekillengen devirlerge ait vaqialar tarif etilgen. 2016 senesi ‘Qırım yurdu’ («Страна Крым») adlı kitap basıldı. Bu eserde orta asır Qırımnı boylap kezintini büyük ustalıqnen tarif etti. Kitapqa Qırım hanlığı zamanına ait inşaatları haqqında 61 oçerk kirsetilgen.
Oleksa Gayvoronskiy ‘Hıdır-dede’ adlı birinci qırımtatar bala film-masalnıñ tsenariyini yazğan edi, ‘Terciman’İ filmi içün İsmail Gasprinskiyniñ, ‘Cigitniñ yolu’ adlı film içün Bekir Çobanzadeniñ biografiyasını araştırdı.
Oleksanıñ qırımtatar tarihınıñ kütleviyleştirilmesine qoşqan issesi ölçelmez.
QRM taqımı merhumnıñ soy-soplarına, yaqınları ve dostlarına teren ve samimiy taziyelerini bildire.