Kiyevde 18-19 iyülde Qırım Platforması ekspertleriniñ ‘Kelecekni körmek: ekspertlerniñ nazarı’ adlı Halqara forum keçirildi.
Forumda dünyanıñ 20 ülkesinden spikerler, şu cümleden Qırımtatar resurs merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı Eskender Bariyev iştirak ettiler.
Öz çıqışında ekspert şunı qayd etti ki, Qırım işğalden azat etilgen soñ mahkeme sistemasınıñ bir sıra problemleri peyda çıqacaq.
‘Qırımda mahkeme sisteması iş tübünde qalğanından zor vaziyette bulunacaq. Şu sebepten de Ukrainada qanuncılıq sistemasını eyileştirmelimiz. Misal olaraq, işğalcılar Qırım territoriyasında yapqan cinayetlerge diqqat çekmelimiz’,- qayd etti Bariyev.
Onıñ aytqanına köre, şimdiden Ukrainada ‘Qırımdan göñülli çıquv tertibi’, ‘Qırımda qanunsız bulunğan vatandaşlarnı Qırımdan çıqaruv tertibi’ kibi qanunlarnı hazırlamaq kerek.
‘Şundan da ğayrı, Qırımda qanunsız qalğan şahıslarnı eñ-evelã belgilemek kerek, çünki bu esnaslar bir künde yapılmaz, vaqıt talap eter’, – añlattı o.
Hatırlatamız ki, 3-7 künleri 2023 senesi QRM Ukrainada ‘Fridrih Naumannıñ serbestlik oğrunda fondu’ Temsilciliginiñ destegi ile ‘Qırım istiqbali’ adlı Strategik forumnı keçirgen edi. Mezkür forumda 20 ülkeniñ tecribeli eksperti, şu cümleden 7 ilimler doktorı iştirak etken edi. Ekspertler Qırım reintegratsıyanıñ 10 yonelişini işlep çıqarğan edi:
- devlet hakimiyeti
- cinaiy siyaset
- grajdan siyaseti
- icret siyaseti
- içtimaiy ve gumanitar siyaset
- informatsıon siyaset
- ekologik siyaset
- adalet siyaseti
- halqara siyaset
- rüşvetke qarşı siyaset