Bazar künü, aprelniñ 16-sında QRM reisi Eskender Bariyev, QRM meneceri Lüdmila Korotkih Dünya qırımtatar kongressiniñ azası Ayla Bakkal ile Kokusta iştirak ettiler.
Bu körüşüv Nyu Yorkta 17 aprelde başlaycaq BMT (OON) tamır halqlarnıñ meseleleri boyunca Daimiy Forumnıñ 22-nci sessiyasınıñ arifesinde bir toplaşuv edi.
Eskender Bariyev öz çıqışında BMT (OON) tamır halqlarnıñ meseleleri boyunca Daimiy Forumnıñ mevzusı ‘ İnsan sağlığı, seyare ve regional sağlıq, iklimniñ deñişmesi’ olğanını bildirdi. Şunıñ içün de muzakereler ketişatında devletlerara çatışma şaraitlerinde tamır halqlarnıñ vaziyeti haqqında meselege ayrı diqqat etmeli:
- Böyle etip tamır halqlar haqqında Deklaratsıyanı bozaraq, işğal ve cenk sebebinden tamır halqlarnıñ medeniy miras abideleri telüke astında bulunmaqtalar.
- Tamır halqlar temsilcileriniñ sağlıq ve hayatları Rusiye ve işğal etilgen Ukraina territoriyasındaki tamır halqlar temsilcileri zorbalıq ile seferberlikke alınmasında ve neticede kütleviy şekilde ölgenleri ya da saqat qalğanlarından büyük telüke altında bulunmaqta.
- Territoriyalar işğal etilgeni içün ve Rusiyeniñ harbiy zulumından dolayı Ana topraqlar zarar köre, tabiat yoq etile.
QRM temsilcileri BMT (OON) tamır halqlarnıñ meseleleri boyunca Daimiy Forumnıñ 22-nci sessiyasında faal iştirak etecekler. Olar halqara cemaatçılıqnı tamır qırımtatar halqnıñ vaziyeti haqqında, işğal etilgen Qırımda qırımtatarlar oğratılğan taqip ve basqılar haqqında añlatacaqlar.
Haberlerimizni taqip etiñiz.