Cuma künü 7 aprelde Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev iftarda iştirak etti.
‘Birlik’ qırımtatar medeniyet merkezinde keçirilgen tedbirge Ukraina prezidenti Vladimir Zelenskiy, ukrain müsülman askerleri, qırımtatar Milliy Meclis liderleri ve müsülman din adamları iştirak ettiler.
Vladimir Zelenskiy qayd etkeni kibi, ‘bu künden başlap resmiy seviyede iftar adetini başlaymız ve böyle etip, Ukriana her bir cemaatqa qıymet bergenini tasdiqlaymız’.
Hatırlatamız ki, Ramazan- müsülmanlarnıñ 29 ya da 30 kün devam etken oraza vaqtıdır. Oraza vaqtına ait belli bir qaideler bar. Yasaq:
· Oraza tutmamaq (ciddiy sebeplerden dolayı oraza tutmağa imkãnları olmağanlar yıl devamında qaza orazalarını tutmalılar);
· Küfür laflar ve yalan aytmaq;
· Suhur ve iftar vaqıtları arasında aşamaq ve içmek;
Ramazan vaqtında hayriye işlerde iştirak etmek, sadaqa bermek pek sevaplıdır. Şundan da ğayrı, temçit ve iftarlarda aileler ve yaqın adamlarğa vaqıtnı beraber keçirmege, duyğu, fikirler, bilgilerinen paylaşmağa daha çoq imkãn peyda ola.