‘Menim adım Adile Ahtemova, men tutuqlanğan Aziz Ahtemovnıñ ömürarqadaşı olam. 2021 senesi, 4 sentãbr gecesi evimizge FSB hadimleri kelip, tintüv keçirdiler. Özlerini tanıttırmadılar. Bir şey tapmayıp, hiç bir delil olmasa da, ömürarqadaşımnı yaqalap, belgisiz yerge alıp kettiler. Özleri bir qaç sual berip yibereceklerine işandırsalar da. Elbette, ne sağlıqlaşıp, ne de bir qaç şey berip yetiştirdik’,- añlata Adile.
Ailede bir qız öse- Asiye, o 2 yaşında. Bala bağçasına daa qatnamay, amma bir yıldan bermege niyetliler.
‘Daha eki yaşında olğanı içün yahşı laf etmey. Şimdilik babası haqqında laf çıqsa, işaretlerinen, duyğularınen tesirlengenini köstere. Ellerini açıp, babası olmağanını köstere. Video ya da fotosını kösterseñ, külimsirey, tesirlene. O her şeyni añlay’,- paylaşa qadın.
Siyasiy mahbüsniñ ömürarqadaşı aytqanına köre, Azizni ne o, ne qızı kördi. Körüşmege izinni talap ete ediler, amma ruhset bermediler.
.jpg)
‘Biz pek qorqqan edik. Men öyle bir şokta edim ki, eki söz bile aytamadım. Bala yuqlay edi. Biz üçümiz yaşaymız: men aqayım ve qızımız. Balam tanış olmağan adamlarnı körgeninen pek qorqtı, çoq ağladı’,- qoştı Adile.
Qadın aytqanı kibi, qızçıq babasınen degil de, fotosınen yaşay demek mümkün.
‘Biz her kün fotolarnı baqamız. Bu meseleni halqara seviyede kötermek kerek, dep sayam. Hem de bu tek bizge degil de, bütün siyasiy mahbüslerge aittir. Çünki hiç bir delili olmadan qabaatlanıp, suçsuz ceza çekmekteler’,- dep qayd etti o.
Keliñiz, balaçıqlarğa yardım eteyik ve babalarını qaytarayıq…Qırımtatar resurs merkeziniñ taqımı eñ yaqın kelecekte her bir bala öz babasına qavuşması içün elinden kelgenini yapmağa tırışa.
Mezkür maqsatqa yetmek içün QRM ‘Babamnı qaytarıñız!’ adlı qısqa vesiqalı filmni çıqarmağa qarar berdi.
Filmde Qırım işğalinden soñra babaları qaçırılğan, ya da hapiske atılğan balalarnıñ taqdir hikãyelerini topladıq. Bazıları babalarınıñ zulumlı tutuqlamalarını öz közlerinen kördiler ve şimdi olarnıñ tek bir arzuları bar: ‘Babamnı qaytarıñız!’
Mezkür film ile ukrain ve halqara cemaatçılıqnıñ diqqatını Qırım siyasiy mahbüsleri ve balalarınıñ meselesine çekmege isteymiz.
Eñ yaqın zamanda filmniñ premyerası olacaq. Haberlerimizni taqip etiñiz.