"Şabannıñ advokatqa aytqanına köre, SİZOda koronavirus yuqunçınıñ tarqaluvı alında iç bir çare körmeyler: maskalar, antiseptikler, mahsus vastalar bermeyler. Bir kamerada çoq insan tutıla. Olarnıñ episi büyük telüke altındadır", – tarif etti o.
Umerovnıñ ömür arqadaşı, siyasiy mabüs 28 kün – fevralniñ 6-dan martnıñ 5-ce ruhiy hastahanede tutıldı, dep qayd etti. Ekimler onı baqqanda yürek hastalığını taptılar, lâkin ciddiy tibbiy baquv keçirmek içün hastahanede cihazlar yoq.
"Bugünki künge, advokatnıñ malümatına köre, aqayımnıñ sağlığı fenalaştı, onı yürek hastalığı ve evelki kibi qan basımı raatsızlay", – dedi qadın.
2019 senesi martnıñ 27-de Rusiye quvetçileri işğal etilgen Qırımda qırımtatarlarnıñ evlerinde kütleviy tintüvler keçirdiler. Tintüvler 26 evde ötkerildi. Bazı faalerde yasaq etilgen kitaplarnı taptılar. "Qırım birdemiligi" birleşmesiniñ malümatına köre, şu kitaplarnı quvetçiler özleri ketirip qoydılar. Kitaplardan ğayrı insanlardan telefon, planşet, noutbuk ve pasportlarını tutıp aldılar. Quvetçiler qırımtatarlarğa nisbeten qaba şekilde areket ete ediler. Tintüvlerge kelgen advokatlarnı müşterilerine yibermey ediler. Tintüvler neticesinde 20 insan yaqalandı. Olarnı Rusiyede yasaq etilgen "Hizb ut-Tahrir" teşkilâtına alâqası olğanında qabaatladılar. Martnıñ 28-de tintüvler keçirilgen vaqıt evlerinde olmağan daa üç qırımtatar faalini yaqaladılar. Martnıñ 27-de ve 28-de işğal "mahkemesi" tintüvlerden soñ yaqalanğan bütün 23 insannı apiske aldı. Soñ olarnıñ apis müddetlerini defalarca uzattılar.