Oraq ayınıñ 5-nde Lvivde “Tesirniñ Küçü” umumukrayin mukâfatınıñ ekinci merasimi olıp keçti, mında Ukrayinanıñ top 100 qadını qayd etildi. Laureatlar arasında Qırımtatar Resurs Merkeziniñ meneceri ve tesisçilerinden biri Zarema Bariyeva. Mukâfat, er kün etken işleri, yolbaşçılığı ve faal vatandaşlığı sayesinde memleketini eyiliğe deñiştirgen, başqalarğa ilham bergen ve sadıqlıq ve sabırnıñ nümünesi olğan qadınlarnı birleştirdi.
“Bu sene uquq qorçalayıcısı faaliyeti ve hususan Ukrayinanıñ işğal etilgen topraqlarında eñ çoq muhtac olğanlarğa qol tutqanı içün mukâfat laureatı olmağa menim içün büyük bir şereftir”, – Zarema Bariyeva dep qayd etti.
Onıñ aytqanına köre, Tesirniñ Küçü” mukâfatı küçlü ve inkişaf etken Ukrayina aqqında hayal qurıp qalmayıp, er kün onıñ dayanıqlığı, ğalebesi ve dünyada kerçek bir dünya markası olması içün çalışqan insanlarnı qayd ete.
Uquq qorçalayıcısı qayd etti ki, mucizeler öz-özünden olmay, ve ukrayin qadınları bunı başqalardan daa yahşı bileler. Er bir ğalebe ve deñişüvniñ artında uzun saatler, künler, aftalar ve bazıda yıllar devam etken, sıq-sıq büyük fedakârlıqlar olğan yorulmaz iş bar.
“Tünevin ülkemiz içün eñ büyük sınavlar vaqtında çette qalmayıp, er biri öz vazifesinde, öz saasında ve zenaatında mesüliyetini öz boynuna alğan laureatlar (arbiy hızmetçiler, ekimler, uquq qorçalayıcıları, maarifçiler, göñülliler, iş adamları, medeniyet erbapları, alimler, siyasetçiler ve sportçılar) arasında bulunğanıma pek quvandım”, – Qırımtatar Resurs Merkeziniñ tesisçilerinden biri dep qayd etti.
Onıñ qayd etkenine köre, mukâfat qazanğan qadınlarnıñ çıqışları, kerçek tesir küçü mukâfat, para ya da vazifelernen degil, iç dayanıqlıq, şahsiy itibar ve er vaqıt ileri ketmek qabiliyetinen ölçene, dep tüşünmege mecbur etti. Bu küç, öz memleketine ve halqına olğan sevgisinen beslenip, er bir qadınnıñ Ukrayina zemaneviy tarihında er kün yapqan deñişmelerinde körüne.
Öz çıqışında Zarema Bariyeva, Qırımdan Karpatlarğa qadar bu memleketni qorçalağan, onı yahşılaştırğan ve er kün er birini öz yönelişinde inkişaf ettirgen, memleketimizdeki deşetli cenkke baqmadan, eñ itibarlı 100 qadın sırasına kirmek içün pek memnün olğanını qayd etti. Bundan da ğayrı, QRM meneceri er keske Qırım – bu Ukrayina olğanını hatırlattı ve mukâfat tesisçisi Anastasiya Hriştuk ve onıñ taqımına mukâfatnıñ eñ yaqın merasimlerinden biri serbest Yaltada Ukrayina mavı-sarı bayrağı altında aynı yüksek seviyede keçirilmesini tiledi.
“Menim içün Hrıstına Bereğovskâ (sanatşınaslıq doktorı, Lviv milliy sanatlar akademiyasınıñ professorı, ZAG galereyasınıñ müdiri), Olğa Boğomolets (tibbiy ilimler doktorı, Dermatologiya ve kosmetologiya institutınıñ tesisçisi), Oksana Dmıtriyeva (“Sluğa Narodu” firqasından Ukrayina halq deputatı), İrına Ğavrıliv (Ukrayina Mudafaa nazirligi ve arbiy brigadalarnıñ çoqusı mukâfatlarınen taqdirlengen, “Vaftiz anası” şartlı isminen, arbiy göñülli), Viktoriya Vatsak (VATSAK şirketiniñ tesisçisi ve baş tehnologiya müdiri), Maryana Mamonova (arbiy hızmetniñ kapitanı, hamilelikniñ 9 aylığında esirlikten azat etildi), Paraskoviya Dvorânın (Ukrayinanıñ nam qazanğan jurnalisti, media tetqiqatçısı, tv ve radio yayınlav kafedrasınıñ müdiri), Anastasiya Miskevıç (USQ mayorı, 32-nci ayrı maşnalı “Çelik brigadanıñ” komandanı), Tonâ Matviyenko (belli ukrain yırcısı), Oksana Osadçuk (arbiy ekim), Sofiya Osoba (içtimaiy erbap, İrına Farionnıñ qızı), Natalâ Matolinets (D.Ğalıtskıy adına LNMU-nıñ prorektorı), Oleksandra Yanovıç (tibbiy 3D-diagnostika merkezleriniñ müdiri, Med Kongressiniñ tesisçisi) ve daa başqaları “, – uquq qorçalayıcısı diqqatnı celp etti.
Bugün em Ukrayina nezaretindeki topraqlarda, em de memleketimizniñ işğal etilgen topraqlarında yaşağan er bir qadın eñ yüksek mukâfatqa lâyıq, çünki 12 yıldan berli özüni qorçalağan, topraq bütünligini qorçalağan ve “ekinci dünya ordusınıñ” dişlerini köstergen memlekette yaşamaq, çalışmaq ve inkişaf etmek kerçekten de paalıdır – da qoştı.
“Bütün qıyınlıqlarğa, yaşayış şaraitine, ğayıplar ve ve raatsızlıqlarğa baqmadan, özlerinde küç tapqan qadınlardan daima ayrette qalam, tek ögge ketmek içün degil de, başqalarnı da ketirip ketirmek içün, yöneliş vektorını şekillendirmek ve cenk sebebinden iç kompasını coyğan başqalarğa yardım etmek içün.
Men, ev ocağınıñ qoruyıcıları degil de, memleketimizniñ faal qoruyıcıları olğan qadınlarnen bir devirde yaşağanım içün ğururlanam, olar – sıñırsızlıq, cesaret ve memleketimizniñ tek ğalebe qazanmasına degil, inkişaf etmesine de yardım etecek umumiy tesir küçümizniñ timsalleridir”, – Zarema Bariyeva dep yekünledi.
Qırımtatar Resurs Merkeziniñ hadimleri Zarema Bariyevni “Tesirniñ Küçü” mukâfatınıñ saibi ve Ukrayinanıñ top 100 qadını sırasına kirgeninen samimiy hayırlaylar. Sağlıq, tükmez küç, yañı zenaat muvafaqiyetleri, uquq qorçalayıcısı faaliyetinde ilerideki muvafaqiyetler, yardımğa muhtac olğan insanlarğa qol tutuv, Qırımnıñ işğalden qurtarıluvı ve Ukrayinanıñ ğalebesi yaqınlaşqanını isteymiz.
