Bazaretesi künü, 17 iyülde tamır halqlarnıñ haqları boyunca OON Ekspert Mehanizmniñ 16-ncı sessiyanıñ işi devamında Ukraina ve Rusiye Federatsıyasınıñ tamır halqları temsilcileri Rusiyeni Ukrainada cenkni toqtatmağa çağırdılar.
Söz Qırımtatar Resurs Merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı Eskender Bariyevge berilgende onıñ artında rf-nıñ tamır halqları temsilcileri «Russia, STOP THE WAR», «Russia must stop killing Indigenous people» yazılarını bulundırğan plakatlarını açıp turdılar.
Yazıq ki, Rusiyede zorbalıqlı seferberlikke ekseriyetnen Şimaliy Kavkaz, Burãtiya, Sibir ve Uralnıñ tamır halqları ve işğal etilgen Qırımda qırımtatar halqınıñ temsilcileri yollanıla. Bu sebepten dolayı erkekler kütleviy şekilde üçünci memleketlerge ketmege mecbur oldılar.
Hatırlatamız ki, forumda Qırımtatar Resurs Merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı Eskender Bariyev ve QRM meneceri Lüdmila Korotkih bulunmaqtalar.