Ukrayina Havfsızlıq Hızmeti Qırım Muhtar Cumhuriyetiniñ vaqtınca işğal etilgen toprağında aqibetli mahsus areket keçirilgenini bildirdi. «Alfa» mahsus areketler merkeziniñ istrebitelleri bir kereden üç rus cenk gemisini urdılar.
️Bu büyük desant gemileri “Yamal” ve “Azov”, em de daa bir cenk gemisidir, şimdiki vaqıtta onıñ çeşiti belli degil. Bundan ğayrı, 21980 “Graçonok” leyhasınıñ diversionğa qarşı kateriniñ ola bilgen yoq etüvi aqqında evelki malümat bar.
Duşmannıñ müim arbiy infrastrukturası da uruldı. Hususan, dronlar «Delfin» alâqa sistemasınıñ antenna blogına, MR-10M1 Mis-M1 radar stantsiyasına, em de “Yugtorsan” cermay mağazasındaki yaqıt baklarına zarar ketirdi.
UHH vaqtınca işğal etilgen topraqlarda rusiye küçleriniñ arbiy imkânlarını, hususan olarnıñ flotını ve logistikasını eksiltmek içün sistemalı sürette çalışalar. Böyle ücümlerniñ toplav effekti bar ve olar duşmannıñ Qırımnı arbiy baza olaraq qullanmağa imkânını bayağı sıñırlay – UHH qayd ete.
Qırımtatar Resurs Merkezi Ukrayina Havfsızlıq Hızmetine semereli işi ve Qırımnıñ yaqınlaşqan deokupatsiyasına qoşqan issesi içün teşekkür bildire.