Qırım siyasiy mabüsi Tofiq Abdulğaziyevniñ miyiniñ yaman tabiatlı şişik, verem hastalığı ve bir qaç ağır hastalıqlar tapılğanına baqmadan, oña qarşı makemege ürmetsizlik (rf CKniñ 297-nci maddesiniñ 2-nci qısmı) sebebinden cinayet davasını açtılar. Bu aqqında «Qırım birdemligi»ne advokat Emil Kürbedinov haber berdi.
Bir kün ögüne, çiçek ayınıñ 17-de, makeme Abdulğaziyevni sağlıq vaziyetine köre azat etüv aqqında dava baqtı, çünki onıñ diagnozları cezanı ileride keçirmege mania olğan hastalıqlar cedveline kirsetilgen.
Аdvokat aytqanına köre, makeme diñlevi vaqtında makemeci özüni red etti ve aynı vaqıtta Abdulğaziyevniñ “uquqnı bozuvı” eken aqqında arizanı yazdı. Keçken mahkemede o, öz mevamını emotsional şekilde bildirdi, amma tafsilâtlarnı aytmadı – advokat qayd ete.
Çiçek ayınıñ 17-de, künniñ soñunace, teşkerüv komitetiniñ vekili advokatqa makemeciniñ beyanatı endi baqılğanını ve cinaiy iş açılğanını bildirdi. Abdulğaziyevniñ azat etilmesi işinde onı teşviqat etken advokat şaat olaraq sorğuğa çağırıldı.
Endi onıñ sağlıq vaziyeti sebebinden azat etilmesi aqqında materiallar makeme başına berilecek, o ise işni başqa makemecige yöneltecek, ve iradeniñ baqılması yañıdan başlanacaq.
Makemege ürmetsizlik maddesine köre Abdulğaziyevni 200 biñ rublge($2600) qadar cerime, 480 saatqace mecburiy iş, eki yılğace tüzetiş işleri ya da altı ayğace apishanege alıp olalar. Faqat o, endi rf CKniñ 205.5-nci maddesine köre cezasını keçirgeni içün, yañı ceza çıqarılğanda, cezalarnıñ umumiyligi qullanıla bile, bu ise umumiy apishanege alınuv müddetiniñ arttırılmasına ketire bile.
Qırımtatar Resurs Merkezi Tofiq Abdulğaziyevniñ ağır sağlıq vaziyeti sebebinden serbestlikten marum etüv şaraitinde tutulması insan aq-uquqlarınıñ qatiy bozulma olğanını qayd ete ve rusiye fderatsiyasından onı tez azat etmesini talap ete!
Hatırlatuv olaraq, Tofik Abdulğaziyev işğal etilgen Qırımda 2019 senesiniñ saban ayınıñ 27-de «Hizbu-ut-Tahrir» işi boyunca tutuldı. 2022 senesi Rostov-na-Donu şeerindeki Cenübiy rayon arbiy makemesi onı 12 yılğa maküm etti.