Cumaaqşamı künü, 7 martta Qırımtatar Resurs Merkeziniñ reisi, qırımtatar Milliy Meclisiniñ çetel işler ve huquq meseleleri boyunca idaresiniñ başı Eskender Bariyev taqrizcı sıfatında Tamır halqlarnıñ sağlığı boyunca global talilniñ işlep çıqarılmasına isse-ekspertler körüşüvi’nde iştirak etti. Tedbir gender meseleleri, insan haqları ve musaviylik Departamentiniñ insan haqları boyunca BST (Bütündünya sağlıq qoruv teşkilãtı) Bölügi ile teşkil etildi.
Körüşüvniñ maqsadı – tamır halqlarnıñ sağlığınen bağıl vaziyetniñ global talilini işlep çıqarılması içün araştırmağa isseni qoşmaq.
Hatırlatamız ki, 2023 senesi mayıs ayında 76-ncı Bütündünya sağlıq qoruv assambleyası tamır halqlarnıñ sağlığınıñ qoruvı boyunca rezolütsiyanı qabul etti. Teşkilãt tamır halqlar sağlığınıñ qoruvı boyunca Global ameller planını işlep çıqarmağa çağıra. Vaziyetniñ talili esasında olğan araştırma Global ameller planını işlep çıqarılmasına öz issesini qoşacaqtır.
«Öz çıqışımda men mezkür araştırmanıñ keçirilmesi içün teşekkürler bildirip şunı qayd ettim ki, şarq avropa regionı haqqından bahs eterek, rus-ukrain cenkiniñ Ukraina tamır halqlarınıñ sağlığına tesiri haqqında mıtlaq söz yürsetir edim. Ukraina tamır halqarını añar ekenmiz, olar işğal altında bulunğanını ve basqı ve zorbalıqlı seferberlik altında bulunğanını unutmamalı. Seferberlik Rysiye tamır halqlarına da aittir. Bu da tamır halqlarnıñ sağlığına ciddiy tesir etecektir», – qayd etti Bariyev.