Cumaaqşamı künü, 22 iyünde saat 15.30 ‘Ukrinform’ informatsıon agentliginde Qırımtatar Resurs Merkezi #LIBERATECRIMEA informatsıon kampaniyası çerçivesinde Qırımtatar bayraq künü munasebetinen matbuat konferentsıyasını keçirecek.
Jurnalistler, cemaat erbapları, istegen her kesni tedbirimizge qoşulmağa davet etemiz.
Spikerler:
Eskender Bariyev – Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı.
Viktor Voynaloviç – Ukraina etnosiyaset ve vicdan serbestligi boyunca devlet hızmetiniñ reis muavini;
Refat Çubarov- qırımtatar Milliy Meclisiniñ reisi;
Tamila Taşeva- QMC-nde Ukraina prezidentiniñ daimiy temsilcisi.
Konferentsıya devamında spikerler qırımtatar bayrağınıñ manası, tarihı haqqında tarif etip, Qırımtatar Bayraq künü resmiy bayram olaraq qabul etilmesiniñ emiyetini añlatacaqlar.
Tedbir çerçivesinde spikerler QRM tarafından Bayraq kününe azırlağan vizual- informatsıon mahsulatını taqdim etip, olıp keçecek tedbirler haqqında bilgi berecekler.
Tedbirni Qırımtatar Resurs Merkeziniñ Facebook sahifesinde seyir etmege mümkün olacaq.
KHV temsilcileriniñ akreditastıyası: [email protected]
Hatırlatamız ki, evelden QRM #LIBERATECRIMEA areketiniñ yañı informatsıon kampaniyasını taqdim etken edi. Kampaniya Ukraina ealisini işğal etilgen Qırımdaki vaziyetnen bağlı bilgilerini arttırmaq içün doğrultılğandır.
Mezkür kampaniyanen tafsilãtlıca öz sahifemizde tanış olmaq mümkün – https://www.ctrcenter.org/liberatecrimea/
Mezkür leyha QRM tarafından Halqara inkişaf boyunca AQŞ Agentligi ile maddiy desteklengen ‘Qoşul!’ adlı cemaat areketine destek olğan Programma çerçivesinde keçirildi. Leyhanıñ mündericesi Pact mesüliyetligindedir ve Halqara inkişaf boyunca AQŞ Agentligi ya da AQŞ hakimiyetiniñ noqtainazarlarını aks etmey bilir.