Rusiyeliler işğal etilgen Qırımnıñ hapishanelerinde qırımtatarlarğa işkence yapalar- Bariyev

January 4, 2023

Qırımtatar resurs merkeziniñ reisi, qırımtatar Milliy Meclisi çetel işler ve huquq meseleleri boyunca idaresiniñ başı Eskender Bariyev  24 Kanalğa intervyu bergende dedi ki, işğal etilgen Qırımda yerli sakinler ve yañı işğal etilgen territoriyalardaki ukrainlerniñ taqipleri toqtamay. Tutuqlanılğanlar işkencege oğratıla.

Bariyevniñ aytqanına köre, cenk başlanmasınen rusiyeliler qırımtatarlarnı başqa maddelerge köre tutuqlamağa başladılar. Eñ-evelã, rusiye ordusınıñ aşşalanılması haqqında söz yürsetile. Cezalanmalar, ayrıca da idariy cezalanmalar sıq-sıq yer almaqta. Şundan da ğayrı, Noman Çelebicihan adına batalyon terrorist teşkilãt olaraq tanıldı, neticede de yañı madde peyda oldı.

‘Bu 2022 senesi 1 iyünde yüz berdi. Artıq vaqtınca işğal etilgen Herson ve Zaporojye vilãyetlerinde ve Qırımda yaşağan faal cemaatçılarnı taqip etmek aleti peyda oldı’, – añlattı o.

Ekspert qayd etkenine köre, rusiyeliler Qırım territoriyasında öz qanunlarını işletmege devam eteler. İşğalcılar Aqmescitte ekinci SİZO( tetqiq hücresi) ve mahsus hücrelerni qurdılar ki, anda Ukrainanıñ işğal etilgen territoriyalardan ketirip yerleştireler. Aynı zamanda işğalcılar bu insanlar haqqında hiç bir bilgi bermeyler.

Onıñ aytqanına köre, aqmescit tetqiq hücresinde(SİZO) Hersonlı bir erkek bulunmaqta. İşğlacılar onı o qadar çekiştirgenler ki, erkek adını bile aytmağa qorqqan. Şundan da ğayrı, yerli hücrelerde suvuq, sıcaq suv yoq, siyasiy mahbüslerni aftada 2-3 kerek hammağa çıqaralar ve 15 daqqa ayırıp, urbaları içinde yuvunmağa mecbur eteler.