Çarşenbe künü, 18 yanvarde, işğal etilgen Qırımda rusiye silãhlı küçleri qırımtatar faal cemaatçı Elmaz Akimovanıñ evine onen qonuşmaq içün keldiler. Elmaz Qırımnı terk etmege mecbur oldı.
‘Bugün(18 yanvarde) aqşam saat altılarğa yaqın huquqqoruyıcı organlarnıñ hadimi kelip çıqtı. Bu sefer bir özü. Soñ 3 afta içerisinde ekinci kere kelgenidir ve kene de evelden aytmayıp, haber bermeyip keldi. Ana-babama özüni polis kapitanı olaraq tanıttı. Mennen subetleşmek içün kelgen eken. Ne qonuşacağını bilmeyim. Bir qaç kün evel advokatlar, dostlarım, tuvğanlarımnıñ tevsiyesinen vaqtınca Qırımnı terk etmege mecbur oldım. Amma tuvğan Qırımıma eñ yaqın zamanda qaytarım, dep ümüt etem,’- yazdı o, Facebook sahifesinde.
Hatırlatamız ki, 2022 senesi dekabr ayınıñ soñunda Elmaz Akimova, evine rusiye ekstremizmge qarşılıq kösterüv Merkeziniñ hadimi ve yerli polis hadimi kelgeni haqqında haber etken edi. O vaqıt oña ihtar ve tenbinen kelgen ediler. Ziyaretleri nenen bağlı olğanını sorağanda, ‘yolbaşçılarnıñ emri ile bazı insanlarnıñ yaşağan yerlerini teşkerüv’nen sebeplengenini aytıldı.